മട്ടാഞ്ചേരി: കൊച്ചി താലൂക്ക് ഓഫിസില്‍ മാനസിക രോഗിയുടെ ആക്രമണം. രാവിലെ ജീവനക്കാര്‍ എത്തുന്നതിന് മുമ്പേ ഓഫിസ് വളപ്പില്‍ പ്രവേശിച്ച മട്ടാഞ്ചേരി സീലാട്ട് ലൈനില്‍ റാഷിദെന്ന യുവാവാണ് ആക്രമണം നടത്തിയത്. ഓഫിസിലെ സര്‍ട്ടിഫിക്കറ്റ് റൂമിന്റെ വാതില്‍ തകര്‍ക്കുകയും മതിലില്‍ പൊതുജനങ്ങള്‍ക്കായി സ്ഥാപിച്ച ബോര്‍ഡ് നശിപ്പിക്കുകയും ചെയ്തു.
സമീപത്ത് പ്രവര്‍ത്തിക്കുന്ന ഫോര്‍ട്ട്‌കൊച്ചി പൊലിസ് സ്റ്റേഷനിലെ ഉദ്യോഗസ്ഥര്‍ സംഭവം കണ്ടതിനെ തുടര്‍ന്ന്  ഇയാളെ കസ്റ്റഡിയിലെടുത്തു. യുവാവിന്റെ മാതാപിതാക്കള്‍ എത്തി ഇയാള്‍ക്ക് മാനസിക രോഗമുണ്ടെന്നറിയിക്കുകയും പരിശോധനയില്‍ ബോധ്യപ്പെടുകയും ചെയ്ത സാഹചര്യത്തില്‍ ഇയാളെ പിന്നീട് പൈങ്കുളത്തെ മാനസികാരോഗ്യ കേന്ദ്രത്തിലേക്ക് മാറ്റി.