കല്‍പ്പറ്റ: കല്‍പ്പറ്റ നഗരസഭയിലെ പഴയ ബസ് സ്റ്റാന്‍ഡില്‍ പ്രവര്‍ത്തിക്കുന്ന ന്യൂനപക്ഷ ക്ഷേമമവകുപ്പ് കോച്ചിങ് സെന്ററിന് നല്‍കിയ ടോയ്‌ലറ്റ് നഗരസഭ കൈയേറിയെന്നത് പ്രതിഷേധാര്‍ഹമെന്ന്് കെ.എസ്.യു സംസ്ഥാന വൈസ് പ്രഡിന്റ് ജഷീര്‍ പള്ളിയാല്‍ പറഞ്ഞു.
മികച്ച രീതിയിലാണ് കോച്ചിങ് സെന്റര്‍ പ്രവര്‍ത്തിക്കുന്നത്. ഇത്തരത്തിലുള്ള ഒരു സ്ഥാപനത്തെ തകര്‍ക്കാനുള്ള ശ്രമത്തില്‍ നിന്ന് നഗരസഭ പിന്തിരിയണമെന്നും അല്ലാത്തപക്ഷം വിദ്യാര്‍ഥികളെ അണിനിരത്തി ശക്തമായ സമരങ്ങള്‍ക്ക് കെ.എസ്.യു നേതൃത്വം നല്‍കുമെന്നും ജില്ലാ നേതാക്കളായ അഫ്‌സല്‍ കുടുക്കി, ശ്രീജിത്ത് കുപ്പാടിത്തറ, ഹര്‍ഷല്‍ കോനാടന്‍, ഷമീര്‍ അബ്ദുല്ല, ജിന്‍സണ്‍ കുളത്തിങ്കല്‍ എന്നിവരും പറഞ്ഞു. രണ്ട് ബാച്ചുകളിലായി 200 കുട്ടികള്‍ പഠിക്കുന്ന കോച്ചിങ് സെന്ററില്‍ 160ഉം പെണ്‍കുട്ടികളാണ്.
ഇവര്‍ക്ക് പലരീതിയിലുള്ള ബുദ്ധിമുട്ടുകളാണ് ടോയ്‌ലറ്റ് പൊതുവാക്കിയതിലൂടെ ഉണ്ടായിരിക്കുന്നത്. പെണ്‍കുട്ടികളെ അപമാനിക്കുന്ന തരത്തിലുള്ള നടപടികളും ഇവിടെ ചിലരില്‍ നിന്നുണ്ടായതായി ആക്ഷേപമുണ്ട്. ഇതില്‍ നഗരസഭയുടെ അടിയന്തര നടപടിയുണ്ടാകണമെന്നും യോഗം ആവശ്യപ്പെട്ടു.