ആദില്‍ ആറാട്ടുപുഴ#

തിരുവനന്തപുരം: തുടര്‍ച്ചയായ തോല്‍വികള്‍ക്കു ശേഷം രഞ്ജി ട്രോഫി ക്രിക്കറ്റില്‍ ഡല്‍ഹിയെ പരാജയപ്പെടുത്തി കേരളത്തിന്റെ തകര്‍പ്പന്‍ തിരിച്ചുവരവ്. ഡല്‍ഹിയെ ഇന്നിങ്‌സിനും 27 റണ്‍സിനുമാണ് കേരളം കെട്ടുകെട്ടിച്ചത്. ജയത്തോടെ പോയിന്റ് ടേബിളില്‍ ഏഴ് പോയിന്റുകള്‍ കൂടി കേരളം കൂട്ടിച്ചേര്‍ത്തു. ആറ് കളികളില്‍ നിന്ന് 20 പോയിന്റുമായി എലൈറ്റ് ഗ്രൂപ്പ് ബിയില്‍ ഒന്നാം സ്ഥാനത്താണ് കേരളം. അഞ്ച് കളികളില്‍ നിന്ന് ഏഴ് പോയിന്റുള്ള ഡല്‍ഹി എലൈറ്റ് ഗ്രൂപ്പ് ബിയില്‍ എട്ടാം സ്ഥാനത്താണ്.
തുമ്പ സെന്റ് സേവിയര്‍ കോളജ് ഗ്രൗണ്ടില്‍ നടന്ന മത്സരത്തില്‍ ഡല്‍ഹിയെ കേരള ബൗളര്‍മാര്‍ എറിഞ്ഞൊതുക്കുകയായിരുന്നു. ആദ്യ ഇന്നിങ്‌സ് മുതല്‍ തകര്‍പ്പന്‍ പ്രകടനം നടത്തുന്ന ജലജ് സക്‌സേനയാണ് മാന്‍ ഓഫ് ദ മാച്ച്. രണ്ട് ഇന്നിങ്‌സുകളില്‍ നിന്നായി ഒന്‍പത് വിക്കറ്റും 68 റണ്‍സും ജലജ് നേടി. കേരളത്തിന്റെ ഒന്നാം ഇന്നിങ്‌സ് സ്‌കോറായ 320നെതിരേ 139 റണ്‍സിനു പുറത്തായി ഫോളോ ഓണ്‍ വഴങ്ങിയ ഡല്‍ഹി രണ്ടാം ഇന്നിങ്‌സില്‍ 154 റണ്‍സിന് പുറത്തായി. സ്‌കോര്‍: കേരളം 320. ഡല്‍ഹി 139, 154.
രണ്ടാം ഇന്നിങ്‌സില്‍ കേരളത്തിനു വേണ്ടി സന്ദീപ് വാരിയരും ജലജ് സക്‌സേനയും മൂന്നു വിക്കറ്റ് വീതമെടുത്തു. ബേസില്‍ തമ്പിയും സിജോമോന്‍ ജോസഫും രണ്ടു വിക്കറ്റുകള്‍ വീതവും വീഴ്ത്തി. മൂന്നാം ദിനം 41ന് അഞ്ച് വിക്കറ്റ് എന്ന നിലയില്‍ കളി തുടങ്ങിയ ഡല്‍ഹി 30 റണ്‍സ് കൂട്ടിച്ചേര്‍ത്തതോടെ ആറാം വിക്കറ്റ് നഷ്ടപ്പെടുത്തി.
ജലജ് സക്‌സേനയുടെ പന്തില്‍ ധ്രുവ് ഷോറി (17)യാണ് വത്സല്‍ ഗോവിന്ദിന് ക്യാച്ച് നല്‍കി മടങ്ങിയത്. അനുജ് റാവത്ത് (31), ശിവം ശര്‍മ (33), സുബോധ് ഭാട്ടി (30) എന്നിവര്‍ പൊരുതാന്‍ ശ്രമിച്ചെങ്കിലും കേരള ബൗളര്‍മാര്‍ക്ക് മുന്നില്‍ പിടിച്ചു നില്‍ക്കാനായില്ല. ആകാശ് സുധന്‍ നാല് റണ്‍സും വികാസ് മിശ്ര രണ്ട് റണ്‍സും(നോട്ടൗട്ട്) നേടി. ശിവാങ്ക് വസിഷ്ട് (0), സാര്‍ഥക് രാജന്‍ (4), ഹൈടെന്‍ ദലാല്‍(14), വൈഭവ് റൗള്‍ (0), ജോണ്ടി സിദ്ധു (6) എന്നിവര്‍ രണ്ടാം ഇന്നിങ്‌സിന്റെ തുടക്കത്തിലേ പവലിയനിലേക്ക് മടങ്ങിയിരുന്നു.
ഒന്നാം ഇന്നിങ്‌സില്‍ മറുപടി ബാറ്റിങ്ങിനിറങ്ങിയ ഡല്‍ഹിയെ തുടക്കം മുതല്‍ ബൗളര്‍മാര്‍ വിറപ്പിച്ചു. നാല് റണ്‍സിന് ഓപ്പണര്‍മാരെ രണ്ടുപേരെയും കേരളം മടക്കി. പിടിച്ചുനില്‍ക്കാന്‍ ശ്രമിച്ച മധ്യനിരയെ ജലജ് സക്‌സേന തകര്‍ത്തു. 31 ഓവര്‍ എറിഞ്ഞ ജലജ് 39 റണ്‍സ് വിട്ടുകൊടുത്ത് 6 വിക്കറ്റ് വീഴ്ത്തി. സിജോമോന്‍ ജോസഫ് രണ്ട് വിക്കറ്റ് നേടി. ബേസില്‍ തമ്പിയും സന്ദീപ് എസ്. വാര്യരും ഓരോ വിക്കറ്റും നേടി. ഡല്‍ഹിക്കായി ഒന്നാം ഇന്നിങ്‌സില്‍ ശിവം ശര്‍മ ആറ് വിക്കറ്റുകള്‍ കൊയ്തു. ആകാശ് സുധന്‍ രണ്ടും വികാസ് മിശ്രയും ശിവാങ്ക് വസിഷ്ടും ഓരോ വിക്കറ്റും നേടി. 30ന് പഞ്ചാബിനെതിരേയാണ് കേരളത്തിന്റെ അടുത്ത മത്സരം.