കാസര്‍കോട്: ആവശ്യങ്ങള്‍ പലതും പരിഗണിക്കുന്നില്ലെന്ന് ആരോപിച്ച് ജില്ലയിലെ എന്‍ഡോസള്‍ഫാന്‍ ദുരിതബാധിതര്‍ വീണ്ടും സമരമുഖത്തേക്ക്. ഏറെക്കാലമായി പ്രത്യക്ഷ സമരത്തിലേര്‍പ്പെടാതിരുന്ന എന്‍ഡോസള്‍ഫാന്‍ ദുരിതബാധിതര്‍ എന്‍ഡോസള്‍ഫാന്‍ പീഡിത ജനകീയ മുന്നണിയുടെ നേതൃത്വത്തിലാണ് സമരരംഗത്തിറങ്ങുന്നത്. ആദ്യഘട്ടമെന്ന നിലയില്‍ നാളെ രാവിലെ കലക്ടറേറ്റിലേക്ക് മാര്‍ച്ച് നടത്തുമെന്ന് എന്‍ഡോസള്‍ഫാന്‍ പീഡിത ജനകീയ മുന്നണി നേതാക്കള്‍ വാര്‍ത്താ സമ്മേളനത്തില്‍ അറിയിച്ചു.
ദേശീയ മനുഷ്യാവകാശ കമ്മിഷനും ഡി.വൈ.എഫ്.ഐ ഹൈക്കോടതിയില്‍ നിന്ന് നേടിയെടുത്ത വിധിയുടെയും പശ്ചാതലത്തില്‍ അനുവദിക്കേണ്ട ആനുകൂല്യങ്ങളൊന്നും തന്നെ വേണ്ട രീതിയില്‍ ലഭിച്ചില്ലെന്നാരോപിച്ചാണ് ദുരിതബാധിതര്‍ സമരമുഖത്തിറങ്ങുന്നത്. വര്‍ഷങ്ങളായി എന്‍ഡോസള്‍ഫാന്‍ ദുരിതബാധിതര്‍ ആവശ്യപ്പെടുന്ന ആവശ്യങ്ങള്‍ പരിഗണിക്കപ്പെടാതെ കിടക്കുമ്പോള്‍ നിലവില്‍ അനുവദിക്കപ്പെട്ട ആനുകൂല്യങ്ങള്‍ പലതും പൂര്‍ണമായും ലഭിക്കാതായിരിക്കുകയുമാണെന്ന് ആരോപിച്ചാണ് നാളെ കലക്ടറേറ്റിലേക്ക് മാര്‍ച്ച് നടത്തുന്നത്.
നിലവില്‍ 5848 പേരാണ് എന്‍ഡോസള്‍ഫാന്‍ ദുരിതബാധിത പട്ടികയില്‍ ഉള്‍പ്പെട്ടിരിക്കുന്നത്. ഇതില്‍ 2820 പേര്‍ക്ക് ഭാഗികമായി ആനുകൂല്യങ്ങള്‍ ലഭിച്ചുവെങ്കിലും 610 പേര്‍ക്ക് ഒരാനൂകൂല്യവും ലഭിക്കുന്നില്ലെന്നാണ് ആരോപണം. ലിസ്റ്റില്‍ ഉള്‍പ്പെട്ട മുഴുവനാളുകള്‍ക്കും ആനുകൂല്യം വിതരണം ചെയ്യണമെന്ന ദേശീയ മനുഷ്യാവകാശ കമ്മിഷന്‍ നിര്‍ദേശം നിലനില്‍ക്കവെയാണ് നിരവധി പേര്‍ക്ക് ആനുകൂല്യം ലഭിക്കാതിരിക്കുന്നത്.
2013 ല്‍ മറ്റ് മാനദണ്ഢങ്ങളൊന്നും നോക്കാതെ ലിസ്റ്റില്‍ ഉള്‍പ്പെട്ടവര്‍ക്കെല്ലാം ബി.പി.എല്‍ കാര്‍ഡ് നല്‍കണമെന്ന നിര്‍ദേശവും കാറ്റില്‍ പറന്നു.
ദുരിത ബാധിതരില്‍ പലരും ഇപ്പോഴും ബി.പി.എല്‍ പട്ടികയില്‍ നിന്ന് പുറത്താണ്. ഗോഡൗണില്‍ കെട്ടികിടക്കുന്നതും നെഞ്ചംപറമ്പിലെ കിണറില്‍ തള്ളിയതുമായ എന്‍ഡോസള്‍ഫാന്‍ തിരിച്ചെടുത്ത് നശിപ്പിക്കാനുള്ള നടപടി വര്‍ഷങ്ങളായിട്ടും പ്രാഥമീക നടപടി പോലും സ്വീകരിച്ചിട്ടില്ലെന്നും ജനകീയ മുന്നണി നേതാക്കള്‍ പറഞ്ഞു.
എന്‍ഡോസള്‍ഫാന്‍ ഇരകള്‍ സമരമുഖത്തിറങ്ങുന്നത് മറ്റൊരു മാര്‍ഗമില്ലാഞ്ഞിട്ടാണെന്നും ഇരകളുടെ കടങ്ങള്‍ എഴുതി തള്ളുന്ന നടപടികള്‍ ഇഴഞ്ഞു നീങ്ങുന്നതിനാല്‍ വീണ്ടും കടം പെരുകുകയാണെന്നും നേതാക്കള്‍ ആരോപിച്ചു.
വാര്‍ത്താ സമ്മേളനത്തില്‍ മുനീസ അമ്പലത്തറ, നാരായണന്‍ പേരിയ, അമ്പലത്തറ കുഞ്ഞികൃഷ്ണന്‍, അബ്ദുല്‍ ഖാദര്‍ ചട്ടഞ്ചാല്‍, എം.പി ജമീല, ബി മിസ്‌രിയ, ശശിധര വെള്ളൂര്‍ സംബന്ധിച്ചു.