രാജപുരം: ദിവസ വേതനക്കാരെ പിരിച്ചുവിടാനുള്ള ഉത്തരവ് വന്നതോടെ ജില്ലയില്‍ കെ.എസ്.ആര്‍.ടി.സി സര്‍വിസ് പ്രതിസന്ധിയിലായി. ഇതേ തുടര്‍ന്ന് കാസര്‍കോട്, കാഞ്ഞങ്ങാട് ഡിപ്പോകളുടെ കീഴിലെ 50 സര്‍വിസുകള്‍ ഇന്നലെ മുടങ്ങി.
ഇന്നലെ ഉച്ചയോടെയാണ് താല്‍ക്കാലിക ജീവനക്കാരെ പിരിച്ചു വിടാനുള്ള ഹൈക്കോടതി ഉത്തരവ് ഡിപ്പോകളിലെത്തിയത്. കാസര്‍കോട് ഡിപ്പോയില്‍ 77 താല്‍ക്കാലിക ജീവനക്കാരെയാണ് കൂട്ടത്തോടെ ഒഴിവാക്കിയത്. 30 സര്‍വിസുകള്‍ ഇന്നലെ തന്നെ മുടങ്ങിയതായി ഡിപ്പോ അധികൃതര്‍ പറഞ്ഞു. 90 ഷെഡ്യൂളുകളാണ് ജില്ലാ ആസ്ഥാനത്തുള്ളത്. ഇവയിലാണ് 30 സര്‍വിസുകള്‍ മുടങ്ങിയത്. മുടങ്ങിയവയില്‍ ഏറെയും മലയോരത്തേക്കുള്ള സര്‍വിസുകളാണ്.
കാഞ്ഞങ്ങാട് ഡിപ്പോയില്‍ 38 ജീവനക്കാരെയാണ് പിരിച്ചുവിട്ടത്. താല്‍ക്കാലിക ജീവനക്കാര്‍ ഒഴിവായതോടെ 20 സര്‍വിസുകള്‍ മുടങ്ങിയിട്ടുണ്ട്. ഇവിടെയും മലയോരത്തേക്കുള്ള സര്‍വിസുകളെയാണ് ഏറെ ബാധിച്ചത്. 37 സര്‍വിസുകളാണ് മലയോരത്തേക്കുള്ളത്. ഉത്തരവ് വരുന്നതിന് മുന്‍പ് ഡ്യൂട്ടിയില്‍ കയറിയ നിരവധി താല്‍ക്കാലിക ജീവനക്കാരുമുണ്ട്. ഡ്യൂട്ടി കഴിഞ്ഞ് തിരിച്ചെത്തുമ്പോള്‍ അവരും ജോലി അവസാനിപ്പിച്ച് പോകുന്നതോടെ കൂടുതല്‍ സര്‍വിസുകള്‍ മുടങ്ങാന്‍ സാധ്യതയുണ്ട്.
താല്‍ക്കാലിക ജീവനക്കാര്‍ ഉണ്ടായിരുന്നപ്പോഴും രണ്ടു ഡിപ്പോകളിലും ജീവനക്കാരുടെ എണ്ണം കുറവാണെന്ന കാരണത്താല്‍ ബസ് സര്‍വിസുകള്‍ മുടങ്ങുന്നത് പതിവായിരുന്നു. പ്രസ്തുത സാഹചര്യത്തില്‍ ഇനിയും കൂടുതല്‍ സര്‍വിസുകള്‍ മുടങ്ങുമെന്നാണ് മലയോര വാസികള്‍ ചൂണ്ടിക്കാട്ടുന്നത്. കാഞ്ഞങ്ങാടുനിന്നു മലയോരം വഴി കണ്ണൂര്‍ വിമാനത്താവളത്തിലേക്ക് ബസ് സര്‍വിസ് അനുവദിച്ചിരുന്നെങ്കിലും ബസും മതിയായ ജീവനക്കാരും ഇല്ലാത്തതിനാല്‍ ഓടാന്‍ തുടങ്ങിയിട്ടില്ല.
ജീവനക്കാരെ കൂട്ടത്തോടെ പിരിച്ചുവിട്ടതോടെ ഈ സര്‍വിസ് അടുത്ത കാലത്തൊന്നും പ്രതീക്ഷിക്കേണ്ടതില്ല. പിരിച്ചുവിട്ട ജീവനക്കാര്‍ക്ക് പകരം പി.എസ്.സി വഴി ജീവനക്കാരെ നിയമിച്ചാല്‍ തന്നെ പരിശീലനം കഴിഞ്ഞ് ഡ്യൂട്ടിയില്‍ പ്രവേശിക്കാന്‍ ആഴ്ചകള്‍ വേണ്ടിവരുമെന്നതിനാല്‍ സര്‍വിസ് നടത്തിക്കൊണ്ടു പോകുന്നത് ഡിപ്പോകള്‍ക്ക് ഏറെ ബുദ്ധിമുട്ടുണ്ടാക്കും.