കല്‍പ്പറ്റ: വെള്ളപ്പൊക്ക ഭീഷണി നേരിടുന്ന ജില്ലയിലെ അഞ്ച് പട്ടികവര്‍ഗ കോളനി നിവാസികളെ പുനരധിവസിപ്പിക്കുന്നതിനുള്ള നടപടി അന്തിമഘട്ടത്തിലേക്ക്.
നൂല്‍പ്പുഴ പഞ്ചായത്തിലെ കാക്കത്തോട്, ചാടകപ്പുര, പുഴങ്കുനി, പുല്‍പ്പള്ളി പഞ്ചായത്തിലെ പാളക്കൊല്ലി, കോട്ടത്തറ പഞ്ചായത്തിലെ വൈശ്യന്‍ കോളനി എന്നിവടങ്ങളിലെ 111 കുടുംബങ്ങള്‍ക്കായി കണ്ടെത്തിയ ഭൂമിയുടെ രജിസ്‌ട്രേഷന്‍ നടപടികള്‍ ഒരു മാസത്തിനകം പൂര്‍ത്തിയാക്കാന്‍ ജില്ലാ കലക്ടര്‍ എ.ആര്‍ അജയകുമാറിന്റെ അധ്യക്ഷതയില്‍ ചേര്‍ന്ന ജില്ലതല പര്‍ച്ചേഴ്‌സ് കമ്മിറ്റി തീരുമാനിച്ചു.
ഓരോ കുടുംബത്തിനും 10 സെന്റ് വീതമാണ് രജിസ്റ്റര്‍ ചെയ്തു നല്‍കുക. ഇതിനായി ജില്ലയിലെ വിവിധ ഭാഗങ്ങളില്‍ 24.39 ഏക്കര്‍ ഭൂമിയാണ് ജില്ലാഭരണകൂടം വാങ്ങുന്നത്. 10 സെന്റ് വീതമുളള 168 പ്ലോട്ടുകളുടെ സ്‌കെച്ച് സര്‍വേ വകുപ്പ് തയാറാക്കി.
യോഗത്തില്‍ എ.ഡി.എം കെ. അജീഷ്, സബ്കലക്ടര്‍ എന്‍.എസ്.കെ ഉമേഷ്, ഫിനാന്‍സ് ഓഫിസര്‍ എ.കെ ദിനേശന്‍, സബ്കലക്ടര്‍ ഇ.പി മേഴ്‌സി വിവിധ ഉദ്യോഗസ്ഥര്‍, ജനപ്രതിനിധികള്‍ പങ്കെടുത്തു.