ഗുരുവായൂര്‍: ഭര്‍തൃവീട്ടിലെ പീഡനത്തെ തുടര്‍ന്ന് യുവതി തൂങ്ങി മരിച്ച സംഭവത്തില്‍ യുവതിയുടെ ഭര്‍ത്താവിനെയും ഭര്‍തൃമാതാവിനെയും പൊലിസ് അറസ്റ്റ് ചെയ്തു. ചേറ്റുവ ചാന്ദ്‌വീട്ടില്‍ ബഷീര്‍ ,റസിയാ ദമ്പതികളുടെ മകള്‍ സജ്‌ന (ഫാത്തിമ 23) ഭര്‍തൃ വീട്ടിലെ കിടപ്പുമുറിയില്‍ തൂങ്ങി മരിച്ച സംഭവത്തിലാണ് ഭര്‍ത്താവ് ഗുരുവായൂര്‍ ഇരിങ്ങപ്പുറം കറുപ്പംവീട്ടില്‍ റഷീദ് (33), റഷീദിന്റെ മാതാവ് കറുപ്പംവീട്ടില്‍ ബീവി (79) എന്നിവരെ് ഗുരുവായൂര്‍ എസ്.ഐ കെ.എ ഫക്രുദ്ദീന്റെ നേതൃത്വത്തില്‍ ഇന്നലെ അറസ്റ്റ് ചെയ്തത്. ഇക്കഴിഞ്ഞ 15നാണ് രണ്ടര വയസും, മൂന്നു മാസവും പ്രായമുള്ള രണ്ടു കുട്ടികളുടെ മാതാവായ സജ്‌നയെ ഇരിങ്ങപ്രത്തെ ഭര്‍ത്താവിന്റെ വീട്ടില്‍ തൂങ്ങി മരിച്ച നിലയില്‍ കണ്ടെത്തിയത്. വീട്ടിലെ കിടപ്പുമുറിയില്‍ തൂങ്ങി നില്‍ക്കുന്ന നിലയില്‍ കണ്ട സജനയെ ഭര്‍ത്താവും ഭര്‍തൃവീട്ടുകാരും ചേര്‍ന്ന് തല കറങ്ങി വീണതാണെന്ന് പറഞ്ഞ് മുതുവട്ടൂരിലെ സ്വകാര്യ ആശുപത്രിയില്‍ കൊണ്ടുപോയിരുന്നു. മരണം നടന്നതിനു ശേഷമാണ് ആശുപത്രിയിലെത്തിയിരുന്നത്.
തലകറങ്ങി വീണതാണന്നു പറഞ്ഞാണ് സജനയെ റഷീദ് ആശുപത്രിയിലെത്തിച്ചത്. ആശുപത്രിയില്‍ എത്തുന്നതിന് മുന്‍പേ സജന മരണപ്പെട്ടിരുന്നു. മരണപ്പെട്ട വിവരം ഡോക്ടര്‍ അറിയിച്ചതോടെ മൃതദേഹം കൊണ്ടുപോകാന്‍ റഷീദും, കുടുംബവും വിഫലശ്രമവും നടത്തി. എന്നാല്‍ കഴുത്തില്‍ പാടുള്ളതിനാല്‍ മൃതദേഹം വിട്ടുകൊടുക്കാതെ ആശുപത്രി അധികൃതര്‍ പൊലിസില്‍ വിവരം അറിയിക്കുകയായിരുന്നു. പൊലിസിനെ വിളിച്ചതോടെ ഭര്‍തൃവീട്ടുകാര്‍ സ്ഥലം വിട്ടു. സജ്‌ന ആത്മഹത്യ ചെയ്ത ദിവസം ഉച്ചക്ക് രണ്ടിന് ഭര്‍തൃവീട്ടില്‍ പ്രശ്‌നങ്ങള്‍ നടന്നിരുന്നതായി സജ്‌ന വീട്ടുകാരെ അറിയിച്ചിരുന്നുവത്രെ. തന്റെ അടുത്തേക്ക് മാതാവിനെ പറഞ്ഞയക്കാന്‍ സജ്‌ന പിതാവിനോട് ആവശ്യപ്പെട്ടിരുന്നു. വൈകീട്ട് മകളുടെ അടുത്ത് എത്താമെന്ന് വീട്ടുകാര്‍ ഉറപ്പുനല്‍കി. ഇതിനിടയിലാണ് ഉച്ചയ്ക്ക് മൂന്നരയോടെ മകളുടെ മരണവിവരം രക്ഷിതാക്കള്‍ അറിയുന്നത്.ഭര്‍തൃവീട്ടിലെ പീഡനമാണ് മകളുടെ മരണത്തിനുകാരണമെന്ന് പിതാവ് ബഷീര്‍ ഗുരുവായൂര്‍ പൊലിസില്‍ നല്‍കിയ മൊഴിയുടെ അടിസ്ഥാനത്തില്‍ പൊലിസ് കേസ് രജിസ്റ്റര്‍ ചെയ്ത് നടത്തിയ അന്വേഷണത്തിലാണ് പ്രതികള്‍ അറസ്റ്റിലായത്.