വാഷിങ്ടണ്‍: മെക്‌സിക്കന്‍ മതില്‍ ബില്ലിന്റെ പേരില്‍ അമേരിക്ക വീണ്ടും ഭരണസ്തംഭനത്തിലേക്ക് നീങ്ങുന്നതായി റിപ്പോര്‍ട്ട്. ബില്‍ യു.എസ് പാര്‍ലമെന്റ് ഉപരിസഭയായ സെനറ്റില്‍ പരാജപ്പെട്ടതോടെയാണ് ഭരണസ്തംഭനത്തിനുള്ള സാധ്യതയേറിയത്. മതില്‍ നിര്‍മാണത്തിനായി അഞ്ച് ബില്യണ്‍ ഡോളര്‍ ആവശ്യപ്പെട്ടുകൊണ്ടുള്ളതാണ് ബില്ല്.

100 അംഗ സെനറ്റില്‍ 51 അംഗങ്ങളാണ് റിപബ്ലിക്കന്‍ പാര്‍ട്ടിക്ക്. ബില്‍ പാസാകാന്‍ 60 വോട്ടുകള്‍ വേണം. ഡമോക്രാറ്റ് അംഗങ്ങള്‍ ബില്‍ പിന്തുണക്കില്ലെന്ന് വ്യക്തമായ സ്ഥിതിക്ക് ന്യൂക്ലിയര്‍ ഓപ്ഷന്‍ നടപ്പാക്കണമെന്ന് പ്രസിഡന്റ് സെനറ്റിലെ റിപബ്ലിക്കന്‍ നേതാവിനോട് ആവശ്യപ്പെട്ടിരുന്നു. 60 വോട്ടുകള്‍ക്ക് പകരം 51 വോട്ടെന്ന ഭൂരിപക്ഷത്തിന് ബില്‍ പാസാക്കാന്‍ അനുവദിക്കുന്നതാണ് ന്യൂക്ലിയര്‍ ഓപ്ഷന്‍. എന്നാല്‍ റിപ്പബ്ലിക്കന്‍ പ്രതിനിധികള്‍ ഇതിന് തയ്യാറല്ല.

ഡെമോക്രാറ്റുകള്‍ നിലപാടുമായി മുന്നോട്ടുപോകുകയാണെങ്കില്‍ സര്‍ക്കാര്‍ പ്രവര്‍ത്തനങ്ങള്‍ നിര്‍ത്തിവെക്കേണ്ടി വരുമെന്ന് ട്രംപ് ട്വിറ്ററിലൂടെ അറിയിച്ചു.

സെനറ്റ് ബില്‍ തള്ളുകയും ഭരണസ്തംഭനം ഉണ്ടാവുകയും ചെയ്താല്‍ പുതുവര്‍ഷം വരെ അത് നീളും. ആഭ്യന്തരസുരക്ഷാവിഭാഗം, ഗതാഗതം, കാര്‍ഷികം, നീതിന്യായവിഭാഗം എന്നിവയുടെ പ്രവര്‍ത്തനം നിലയ്ക്കും. ഇതോടെ എട്ടുലക്ഷം തൊഴിലാളികള്‍ക്ക് ശമ്പളം നഷ്ടമാകും.