പെഷാവര്‍: ബോളിവുഡിലെ ഇതിഹാസ താരങ്ങളായ രാജ്കപൂറിന്റെയും ദിലീപ്കുമാറിന്റെയും പൂര്‍വിക ഭവനങ്ങള്‍ സ്വാന്തമാക്കാന്‍ നീക്കവുമായി പാക് സര്‍ക്കാര്‍. പാകിസ്താനിലെ വടക്കു പടിഞ്ഞാറന്‍ പ്രവിശ്യയായ ഖൈബര്‍ പഖ്തുന്‍ഖ്വാ ഭരണകൂടമാണ് ദേശീയ പൈതൃക കേന്ദ്രങ്ങളായി കണക്കാക്കി ഇന്ത്യന്‍ ഇതിഹാസങ്ങളുടെ പൂര്‍വികര്‍ കഴിഞ്ഞ വസതികള്‍ വിലയ്ക്കുവാങ്ങുന്നത്.
ഇന്ത്യാ-പാക് വിഭജനത്തിനുമുന്‍പുള്ള ചരിത്രപ്രാധാന്യമുള്ള 25ഓളം കെട്ടിടങ്ങള്‍ വാങ്ങി പൈതൃകകേന്ദ്രങ്ങളാക്കി സംരക്ഷിക്കാനാണ് ഖൈബര്‍ പ്രവിശ്യാ സര്‍ക്കാരിന്റെ നീക്കം. ഇതിലാണ് പെഷാവറിലുള്ള കപൂര്‍ ഹവേലി എന്ന പേരില്‍ അറിയപ്പെടുന്ന രാജ് കപൂറിന്റെ പൂര്‍വിക ഭവനവും ദിലീപ് കുമാറിന്റെ നൂറുവര്‍ഷത്തിലേറെ പഴക്കമുള്ള വീടും ഉള്‍പ്പെട്ടിരിക്കുന്നത്.
ഇന്ത്യയുടെ സ്വാതന്ത്ര്യ സമര ചരിത്രത്തിലടക്കം ഏറെ പ്രാധാന്യമുള്ള പ്രദേശമായ ഖിസ്സ ഖവാനി ബസാറിലാണു രണ്ടു വീടുകളുമുള്ളത്.
1918നും 1922നുമിടയില്‍ രാജ് കപൂറിന്റെ മുത്തച്ഛന്‍ ദിവാന്‍ ബഷേശ്വര്‍നാഥ് കപൂര്‍ പണികഴിപ്പിച്ചതാണ് കപൂര്‍ ഹവേലി. രാജ് കപൂറും രാജിന്റെ അച്ഛന്റെ സഹോദരനും ബോളിവുഡ് നടനുമായിരുന്ന ത്രിലോക് കപൂറും ഇവിടെയാണു ജനിച്ചത്.
ഏറെക്കുറെ ഇതിനടുത്തായി തന്നെയാണ് ഒരു നൂറ്റാണ്ടിന്റെ ചരിത്രം പറയാനുള്ള ദിലീപ് കുമാറിന്റെ പൂര്‍വിക ഭവനവും നിലകൊള്ളുന്നത്. 2014ല്‍ നവാസ് ശരീഫ് സര്‍ക്കാര്‍ കൊണ്ടുവന്ന ഫെഡറല്‍ പുരാവസ്തു നിയമ പ്രകാരമാണ് ഇരുകെട്ടിടങ്ങളും ദേശീയ പൈതൃക കേന്ദ്രമായി ഇപ്പോള്‍ പ്രവിശ്യാ ഭരണകൂടം പ്രഖ്യാപിച്ചിരിക്കുന്നത്. ഏകദേശം 61 കോടി രൂപ ചെലവാക്കിയാണ് കെട്ടിടങ്ങള്‍ ഭരണകൂടം സ്വന്തമാക്കിയിരിക്കുന്നത്.