അങ്ങാടിപ്പുറം: ഒരുകാലത്ത് സംസ്ഥാനത്തിന് പുറത്തുമാത്രം കണ്ടിരുന്ന സൂര്യകാന്തിയുടെ വിസ്മയക്കാഴ്ച കാണാന്‍ ഇനി സംസ്ഥാനാതിര്‍ത്തി കടന്ന് ഗുണ്ടല്‍പേട്ടയിലൊന്നും പോകേണ്ടതില്ല. കുറുവ പഞ്ചായത്തിലെ കരിഞ്ചാപാടി പൊരുന്നംപറമ്പില്‍ പോയാല്‍ മതി. കരിഞ്ചാപാടിയില്‍ വിളഞ്ഞുനില്‍ക്കുന്ന സ്വര്‍ണ വര്‍ണത്തില്‍ പൂത്തുലഞ്ഞ സൂര്യകാന്തിപ്പൂക്കള്‍ കാണാന്‍ സന്ദര്‍ശകരുടെ തിരക്കാണ്. ജില്ലയിലെ മികച്ച കര്‍ഷകനുള്ള പുരസ്‌കാരം നേടിയ കരുവള്ളി അമീര്‍ ബാബുവിന്റെ പുതിയ കൃഷി പരീക്ഷണമാണ് സൂര്യകാന്തികൃഷി. അര ഏക്കറിലാണ് കൃഷി ചെയ്തത്.
കണിവെള്ളരിയില്‍ പ്രശസ്തമായ കരിഞ്ചാപാടി പാടശേഖരം സൂര്യകാന്തി ചെടികള്‍ക്ക് കൂടി വളക്കൂറുള്ള മണ്ണാവുന്നത് കൃഷിയെ നെഞ്ചേറ്റിയ നാട്ടുകാര്‍ക്ക് ആഹ്ലാദം പകരുന്നുണ്ട്. കലര്‍പ്പില്ലാത്ത സൂര്യകാന്തി എണ്ണ നാട്ടുകാര്‍ക്ക് ലഭ്യമാക്കുകയെന്നതാണ് തന്റെ ലക്ഷ്യമെന്നാണ് അമീര്‍ബാബു പറയുന്നത്. ഗുണ്ടല്‍േപേട്ടിലെ മില്ലിലെത്തിച്ച് എണ്ണയാക്കാനാണ് ഉദ്ദേശിക്കുന്നത്.
നാരുകള്‍ കൂടുതലുള്ളതുകൊണ്ട് പേപ്പര്‍ നിര്‍മാണത്തിനും കാലിത്തീറ്റ മിശ്രിതമായും സൂര്യകാന്തി ഇല ഉപയോഗിക്കാം. അമേരിക്കയില്‍ നിന്ന് വിരുന്നെത്തിയ സൂര്യകാന്തി കേരളത്തില്‍ അപൂര്‍വമാണ്. 'ആസ്റ്ററാസീയേ' എന്ന സസ്യ കുടുംബത്തില്‍പ്പെട്ടതാണിത്. വര്‍ഷത്തില്‍ ഒരു തവണ പൂവിടും. കൊഴുപ്പില്ലാത്ത എണ്ണയായതിനാല്‍ സൂര്യകാന്തി എണ്ണ പാചകത്തിനായി ഇപ്പോള്‍ വ്യാപകമായി ഉപയോഗിക്കുന്നുണ്ട്. കഴിഞ്ഞ ഒന്നു രണ്ടു വര്‍ഷമായി ജില്ലയിലെ തന്നെ പുലാമന്തോള്‍ പാലൂരിലും സമീപപ്രദേശമായ വടക്കന്‍ പാലൂരിലും വിജയകരമായി സൂര്യകാന്തി കൃഷിചെയ്തിരുന്നു.