കാസര്‍കോട്: കൊലപാതകമടക്കം നിരവധി കേസുകളില്‍ പ്രതിയായ യുവാവിനെ ബൈക്കില്‍ കാറിടിച്ചു വീഴ്ത്തി കൊലപ്പെടുത്താന്‍ ശ്രമിച്ചുവെന്ന പരാതിയില്‍ കണ്ടാലറിയാവുന്ന നാലു പേര്‍ക്കെതിരേ കാസര്‍കോട് പൊലിസ് വധശ്രമത്തിനു കേസെടുത്തു. കൊലപാതകം ഉള്‍പ്പെടെ അഞ്ചു കേസുകളില്‍ പ്രതിയായ അണങ്കൂര്‍ ജെ.പി കോളനിയിലെ ജ്യോതിഷി(30)നു നേരെയാണ് അക്രമമുണ്ടായത്.
ഇന്നലെ വൈകുന്നേരം ആറരയോടെ കോട്ടക്കണ്ണി പി.എം റോഡ് ജങ്ഷനിലാണു സംഭവം. പുതിയ ബസ് സ്റ്റാന്‍ഡില്‍ നിന്ന് അണങ്കൂരിലെ ജെ.പി കോളനിയിലേക്കു പോകുന്നതിനിടെ കോട്ടക്കണ്ണി ഭാഗത്തു നിന്നു പുതിയ ബസ് സ്റ്റാന്‍ഡ് ഭാഗത്തേക്കു വരികയായിരുന്ന വെള്ള മാരുതി കാറിലെത്തിയ സംഘമാണു ജ്യോതിഷിന്റെ ബൈക്കിലിടിച്ചതെന്നാണു പറയുന്നത്. കാറില്‍ നിന്നു രണ്ടു പേര്‍ ഇറങ്ങി അക്രമിക്കാന്‍ ശ്രമിക്കുന്നതിനിടെ ആളുകള്‍ ഓടിക്കൂടിയതിനാല്‍ സംഘം രക്ഷപ്പെടുകയായിരുന്നുവെന്നു ജ്യോതിഷ് പരാതിപ്പെട്ടു.
ജ്യോതിഷ് കാസര്‍കോട്ടെ സ്വകാര്യ ആശുപത്രിയില്‍ ചികിത്സയിലാണ്.
ജ്യോതിഷിനു നേരെ ഏതാനും വര്‍ഷം മുമ്പും വധശ്രമം ഉണ്ടായിരുന്നു. മുഹമ്മദ് സിനാന്‍ വധക്കേസിലെ പ്രതിയാണ് ജ്യോതിഷ്. അക്രമി സംഘത്തെക്കുറിച്ച് അന്വേഷിച്ചു വരികയാണ്.