ഗൊരഖ്പൂര്‍: രഹസ്യമായി വിവാഹം കഴിച്ച യുവതിയെ ഡോക്ടറായ ഭര്‍ത്താവ് കൊലപ്പെടുത്തി. വിനോദയാത്രക്കെന്നുപറഞ്ഞ് ഇവരെ കൂട്ടിക്കൊണ്ടുപോയി കൊക്കയിലേക്ക് തള്ളിയിട്ട് കൊലപ്പെടുത്തുകയായിരുന്നു.

ഉത്തര്‍പ്രദേശിലെ ഗൊരഖ്പൂരിലെ ഡോക്ടറായ ധര്‍മേന്ദ്ര പ്രതാപ് സിങ് ആണ് ഭാര്യ രാഖി ശ്രീവാസ്തവയെ കൊലപ്പെടുത്തിയത്. ഏഴുമാസം മുന്‍പാണ് നേപ്പാളിലെ പൊഖ്‌റയില്‍ വച്ച് ഇവരെ കൊക്കയിലേക്കു തള്ളിയിട്ട് കൊലപ്പെടുത്തിയത്. മറ്റൊരാളെ യുവതി വിവാഹം കഴിച്ചുവെന്നതാണ് ഡോക്ടറെ പ്രകോപിതനാക്കിയത്. യുവതി അസമിലാണെന്ന് കാണിക്കുന്നതിനായി ഇവരുടെ ഫെയ്‌സ്ബുക്ക് അക്കൗണ്ട് ലൈവാക്കി വയ്ക്കുകയും ചെയ്തു.

യുവതി ജീവിച്ചിരിപ്പുണ്ടെന്നു കാണിച്ച് സോഷ്യല്‍ മീഡിയ അക്കൗണ്ട് ലൈവാക്കി നിലനിര്‍ത്തിയ ഡോക്ടറെ കഴിഞ്ഞ ദിവസമാണ് പൊലിസ് അറസ്റ്റ് ചെയ്തത്. ഡോക്ടറുടെ സഹായികളായ പ്രമോദ് കുമാര്‍ സിങ്, ദേശ് ദീപക് നിഷാദ് എന്നിവരെയും പൊലിസ് അറസ്റ്റ് ചെയ്തു.

യുവതിയെ കാണാനില്ലെന്ന് കാണിച്ച് ബന്ധുക്കള്‍ പൊലിസില്‍ പരാതി നല്‍കി. ഇതേതുടര്‍ന്ന് നടത്തിയ അന്വേഷണത്തില്‍ യുവതിയെ വിവാഹം കഴിച്ച മനിഷ് സിന്‍ഹയെ പൊലിസ് കസ്റ്റഡിയിലെടുത്തു ചോദ്യം ചെയ്തു.

എന്നാല്‍ ഇയാള്‍ നിരപരാധിയാണെന്ന് കണ്ടെത്തിയതോടെ ഡോക്ടറെ ചോദ്യം ചെയ്തപ്പോഴാണ് ഞെട്ടിപ്പിക്കുന്ന വിവരം പുറത്തായത്.
അന്വേഷണത്തിനായി രൂപീകരിച്ച പ്രത്യേക സംഘമാണ് കേസിന് തുമ്പുണ്ടാക്കിയത്. നേപ്പാളിലെ പൊഖ്‌റയിലെത്തിയ പൊലിസ് കൊക്കയില്‍നിന്ന് യുവതിയുടെ മൃതദേഹാവശിഷ്ടങ്ങള്‍ കണ്ടെടുത്തിട്ടുണ്ട്.