മനാമ: ബഹ്‌റൈന്‍ അന്താരാഷ്ട്ര വിമാനത്താവളത്തിലെ സര്‍വീസുകള്‍ സാധാരണ നിലയിലായതായി അധികൃതര്‍ അറിയിച്ചു.

അമേരിക്കയുടെ എഫ്18 ഇനത്തില്‍ പെട്ട പോര്‍വിമാനം കഴിഞ്ഞ ദിവസം ഇവിടെ ഇടിച്ചിറക്കിയതിനെ തുടര്‍ന്നാണ് സര്‍വീസുകള്‍ താറുമാറായത്.

വിവിധ വിമാനങ്ങള്‍ വഴി തിരിച്ചു വിട്ടാണ് സര്‍വീസുകള്‍ പുന:ക്രമീകരിച്ചത്.

ഇതേ തുടര്‍ന്ന് കൊച്ചിയില്‍ നിന്ന് കോഴിക്കോട് വഴി ബഹ്‌റൈനിലേക്ക് വന്ന എയര്‍ഇന്ത്യ എക്‌സ്പ്രസ് വിമാനം ദമ്മാമിലാണ് ഇറക്കിയത്.

യു.എസ് വിമാനവാഹിനി കപ്പലായ യു.എസ്.എസ് നിമിറ്റ്‌സില്‍ നിന്നും പറന്നുപൊങ്ങിയ എഫ്18 വിമാനത്തിന്റെ എഞ്ചിന്‍ തകരായതായി ശ്രദ്ധയില്‍ പെട്ടതിനെ തുടര്‍ന്ന്് അടിയന്തരമായി നിലത്തിറക്കാന്‍ പൈലറ്റ് തീരുമാനിക്കുകയായിരുന്നുവെന്ന്് കപ്പല്‍ പടയുടെ വക്താവ് ബില്‍ അര്‍ബന്‍ അറിയിച്ചു.

ആദ്യം ശൈഖ് ഈസ എയര്‍ ബേസില്‍ ഇറക്കാനാണ് പൈലറ്റ് ശ്രമിച്ചത്. എന്നാല്‍ അതുസാധിക്കാതെ വന്നപ്പോള്‍ വിമാനത്താവളത്തില്‍ തന്നെ ഇറക്കുകയായിരുന്നുവെന്നും പൈലറ്റ് സുരക്ഷിതനാണെന്നും പ്രസ്താവനയില്‍ അറിയിച്ചു.

അതേ സമയം സംഭവത്തെകുറിച്ച് ബഹ്‌റൈന്‍ എയര്‍പോര്‍ട്ടധികൃതര്‍ അന്വേഷണം ആരംഭിച്ചിട്ടുണ്ട്

വിമാനം ഇടിച്ചിറക്കിയത്് വലിയ സംഭവമായി കാണേണ്ടതില്ലെന്നും സംഭവത്തില്‍ പൈലറ്റ് സുരക്ഷിതനാണെന്നും ആര്‍ക്കും പരുക്കേറ്റിട്ടില്ലെന്നും ഗതാഗത വാര്‍ത്താവിനിമയ മന്ത്രാലയവും അറിയിച്ചു.