ലണ്ടന്‍: കരിയറിലെ അവസാന പോരില്‍ ഇരട്ട സ്വര്‍ണം നേടി ലോക ചാംപ്യന്‍ഷിപ്പില്‍ ഹാട്രിക്ക് തികച്ച് കളം വിടാനുള്ള ദീര്‍ഘ ദൂരത്തിലെ ഇതിഹാസം മോ ഫറയുടെ സ്വപ്നങ്ങള്‍ക്കും തിരിച്ചടി. 10000 മീറ്ററില്‍ സ്വര്‍ണം നേടി അവസാന പോരിനായി 5000 മീറ്ററിന്റെ ട്രാക്കിലിറങ്ങിയ ഫറയ്ക്ക് വെള്ളി നേട്ടത്തോടെ കരിയര്‍ അവസാനിപ്പിക്കേണ്ടി വന്നു. മോസ്‌ക്കോയിലും ബെയ്ജിങിലും ഇരട്ട സ്വര്‍ണം നേടിയ ഫറ ഇരട്ട സ്വര്‍ണത്തില്‍ ഹാട്രിക്ക് തികക്കാനുള്ള പ്രതീക്ഷയുമായാണ് ലണ്ടനിലെ ട്രാക്കില്‍ ഇറങ്ങിയത്. എന്നാല്‍ അവസാന നിമിഷത്തില്‍ അപ്രതീക്ഷിത കുതിപ്പ് നടത്തി എത്യോപ്യന്‍ താരം മുക്താര്‍ എഡ്രിസ് സ്വര്‍ണം പിടിച്ചെടുക്കുമ്പോള്‍ ഫറ രണ്ടാമനായാണ് മത്സരം പൂര്‍ത്തിയാക്കിയത്. എഡ്രിസ് 13.32.79 സെക്കന്‍ഡിലാണ് സുവര്‍ണ താരമായത്. ഫറ 13.33.22 സെക്കന്‍ഡിലാണ് രണ്ടാമതെത്തിയത്. അമേരിക്കയുടെ കിപ്‌കെമോയ് ചെലിമോയ്ക്കാണ് വെങ്കലം.