തളിപ്പറമ്പ് : ഏഴാംമൈലിലെ സൂപ്പര്‍മാര്‍ക്കറ്റിലും, തളിപ്പറമ്പ് മെയിന്‍ റോഡിലെ കടകളിലും കവര്‍ച്ച നടത്തിയ കേസില്‍ പിടിയിലായ തൊരപ്പന്‍ സന്തോഷിനെ തളിപ്പറമ്പ് പൊലിസ് കസ്റ്റഡിയില്‍ വാങ്ങി ചോദ്യം ചെയ്തതിനെത്തുടര്‍ന്ന് കവര്‍ച്ചക്കുപയോഗിച്ച് ആയുധങ്ങള്‍ പൊലിസ് കണ്ടെടുത്തു. തളിപ്പറമ്പ അഡി.എസ്.ഐ വര്‍ഗീസിന്റെ നേതൃത്വത്തിലുള്ള സംഘമാണ് കഴിഞ്ഞ ദിവസം തൊരപ്പന്‍ സന്തോഷിനെ കസ്റ്റഡിയില്‍ വാങ്ങി തെളിവെടുപ്പ് നടത്തിയത്. സൂപ്പര്‍മാര്‍ക്കറ്റ് തുരക്കാനുപയോഗിച്ച പാര കുറ്റിക്കോലിലെ പഴയ ടോള്‍ബൂത്തിനു സമീപം കുറ്റിക്കാട്ടില്‍ ഉപേക്ഷിച്ച നിലയിലാണ് പൊലിസ് കണ്ടെടുത്തത്. തുടര്‍ന്ന് തെളിവെടുപ്പ് പൂര്‍ത്തിയാക്കി കോടതിയില്‍ ഹാജരാക്കിയ സന്തോഷിനെ റിമാന്‍ഡ് ചെയ്തു. കഴിഞ്ഞ 22നാണ് മൂന്നു പേരും ശ്രീകണ്ഠപുരം പൊലിസിന്റെ പിടിയിലായത്.