ന്യൂഡല്‍ഹി: മുന്‍പ്രധാനമന്ത്രി രാജീവ് ഗാന്ധിയെ വധിക്കാന്‍ ഉപയോഗിച്ച ബോംബ് നിര്‍മാണത്തിന് പിന്നിലെ ഗൂഢാലോചന സംബന്ധിച്ച അന്വേഷണ വിവരങ്ങള്‍ അറിയിക്കണമെന്ന് സുപ്രിം കോടതി. ബോംബ് നിര്‍മിച്ചതും അത് വിതരണം ചെയ്തതും ആരാണെന്നും ഇതു സംബന്ധിച്ച പുനരന്വേഷണത്തിന്റെ വിവരങ്ങള്‍ എന്താണെന്നുമുള്ള കാര്യങ്ങള്‍ കോടതിയെ അറിയിക്കണമെന്നാണ് ജസ്റ്റിസ് രഞ്ജന്‍ ഗൊഗോയി അധ്യക്ഷനായ ബെഞ്ച് കേന്ദ്ര സര്‍ക്കാരിനോട് ആവശ്യപ്പെട്ടിരിക്കുന്നത്.
രാജീവ് ഗാന്ധിയെ കൊലപ്പെടുത്തുന്നതിനുള്ള ബോംബ് നിര്‍മിക്കാന്‍ സഹായിച്ചെന്ന കേസില്‍ തടവില്‍ കഴിയുന്ന പേരറിവാളന്‍ നല്‍കിയ ഹരജിയിലാണ് കോടതിയുടെ നടപടി. ഈ വിഷയം ശരിയായ രീതിയില്‍ അന്വേഷണം നടത്തിയിട്ടില്ലെന്നാണ് പേരറിവാളനുവേണ്ടി ഹാജരായ അഭിഭാഷകന്‍ ഗോപാല്‍ ശങ്കരനാരായണന്‍ കോടതിയില്‍ വാദിച്ചത്. കേസ് അടുത്ത ആഴ്ച വീണ്ടും പരിഗണിക്കും. രാജീവ് ഗാന്ധിയെ വധിക്കാന്‍ ഉപയോഗിച്ച ബോംബ് നിര്‍മിക്കുന്നതിനുള്ള 9 വോള്‍ട്ടിന്റെ രണ്ടു ബാറ്ററികള്‍ വിതരണം ചെയ്തുവെന്നാണ് പേരറിവാളനെതിരായ കുറ്റം.
ബോംബ് നിര്‍മാണം അടക്കം കേസിലെ വിവിധ വിഷയങ്ങള്‍ അന്വേഷിക്കാനായി രൂപീകരിച്ച സി.ബി.ഐയിലെ പ്രത്യേക യൂനിറ്റായ മള്‍ട്ടി ഡിസിപ്ലിനറി മോണിറ്ററിങ് ഏജന്‍സി (എം.ഡി.എം.എ)യുടെ അന്വേഷണ റിപ്പോര്‍ട്ടിലെ വിവരങ്ങള്‍ തേടിയാണ് പേരറിവാളന്റെ അഭിഭാഷകന്‍ കോടതിയെ സമീപിച്ചത്. ഈ റിപ്പോര്‍ട്ട് വന്നാല്‍ തന്റെ കക്ഷിയുടെ നിരപരാധിത്വം തെളിയുമെന്ന് അദ്ദേഹം ചൂണ്ടിക്കാട്ടി. ആരാണ് ബോംബ് നിര്‍മിച്ചതെന്നോ എങ്ങനെ നിര്‍മിച്ചുവെന്നോ എങ്ങനെ അതു വിതരണം ചെയ്‌തെന്നോ അന്വേഷണ സംഘം ഇതുവരെ വ്യക്തമാക്കിയിട്ടില്ലെന്ന് ഗോപാല്‍ ശങ്കരനാരായണന്‍ കോടതിയെ അറിയിച്ചു.