വേങ്ങര: ജനാധിപത്യത്തിന്റെ ശക്തി തിരിച്ചറിഞ്ഞ് സംഘടിപ്പിച്ച സ്‌കൂള്‍ പാര്‍ലമെന്റ് തെരഞ്ഞെടുപ്പ് ശ്രദ്ധേയമായി. കുറ്റൂര്‍നോര്‍ത്ത് കെ.എം.എച്ച്.എസ് സ്‌കൂള്‍ ഹയര്‍സെക്കന്‍ഡറി വിഭാഗം പൊളിറ്റിക്കല്‍ സയന്‍സ് ഡിപ്പാര്‍ട്ട്‌മെന്റാണ് സഹപാഠികള്‍ക്ക് ജനാധിപത്യപ്രക്രിയയുടെ മധുരം പകര്‍ന്ന് തെരഞ്ഞെടുപ്പ് നടത്തിയത്.
ബാലറ്റ് പേപ്പര്‍ ഉപയോഗിച്ച് സ്‌കൂള്‍ പാര്‍ലമെന്റിലെ അഞ്ചുസ്ഥാനങ്ങളിലേക്ക് നടത്തിയ തെരഞ്ഞെടുപ്പില്‍ സ്‌കൂളിലെ 600 കുട്ടികള്‍ സമ്മതിദാനാവകാശം വിനിയോഗിച്ചു. ആകെ 16 സ്ഥാനാര്‍ഥികളാണ് മത്സരരംഗത്തുണ്ടായിരുന്നത്.
വാശിയേറിയ പ്രചാരണ പ്രവര്‍ത്തനങ്ങള്‍ക്ക് ശേഷം നടന്ന തെരഞ്ഞെടുപ്പിന്റെ ഫലം പുറത്തുവന്നപ്പോള്‍ അര്‍ഷദ് ഫാസില്‍(ചെയര്‍മാന്‍), അല്‍ഫീന എ.വി(വൈസ് ചെയര്‍പേഴ്‌സണ്‍), മുഹമ്മദ് സെനിന്‍ എം.കെ(ജന. സെക്രട്ടറി), ഹുസൈന്‍ പി(സ്‌പോര്‍ട്‌സ് സെക്രട്ടറി), മുഷ്ഫിറ പി.കെ(ആര്‍ട്‌സ് സെക്രട്ടറി) എന്നിവര്‍ വിജയികളായി. ഇലക്ഷന്‍ കമ്മിഷണറായി പ്രിന്‍സിപ്പല്‍ വി.കെ പങ്കജാക്ഷി ടീച്ചറും റിട്ടേണിങ് ഓഫിസറായി അധ്യാപന്‍ യാസിര്‍ പൂവിലും പ്രവര്‍ത്തിച്ചു. പ്രിസൈഡിങ് ഓഫിസര്‍, ബി.എല്‍.ഒ തുടങ്ങിയ പദവികള്‍ വിദ്യാര്‍ഥികള്‍ തന്നെ വഹിച്ചു. വിജയികളെ മാനേജര്‍ കെ.പി  കുഞ്ഞിമൊയ്തു ഹാജി അനുമോദിച്ചു.