തിരുവനന്തപുരം: സംസ്ഥാനത്തെ വിവിധ റെയില്‍വേ സ്റ്റേഷനുകളിലെ വിവിധ സംരംഭങ്ങള്‍ കേന്ദ്ര റെയില്‍വേ മന്ത്രി സുരേഷ് പ്രഭു വീഡിയോ കോണ്‍ഫറന്‍സിങ് വഴി ഉദ്ഘാടനം ചെയ്തു. തിരുവനന്തപുരം സെന്‍ട്രല്‍ , കൊച്ചുവേളി, കൊല്ലം, ചെങ്ങന്നൂര്‍, എറണാകുളം ജങ്ഷന്‍, കണ്ണൂര്‍ റെയില്‍വേ സ്റ്റേഷനുകളിലെ സംരംഭങ്ങളാണ് യാത്രക്കാര്‍ക്കായി സമര്‍പ്പിച്ചത്. തിരുവനന്തപുരം, കൊല്ലം സ്റ്റേഷനുകളിലെ ശീതീകരിച്ച കാത്തിരിപ്പു കേന്ദ്രവും, കൊച്ചുവേളിയിലെ മേല്‍പ്പാലവും, കൊല്ലത്തെ കോണ്‍ക്രീറ്റ് ഇരിപ്പിടങ്ങളും ചെങ്ങന്നൂര്‍, എറണാകുളം ജങ്ഷന്‍ സ്റ്റേഷനുകളിലെ ലിഫ്റ്റുകളും എറണാകുളം ജങ്ഷന്‍, എറണാകുളം ടൗണ്‍, ആലുവ സ്റ്റേഷനുകളില്‍ ജലവില്‍പന യന്ത്രവും കണ്ണൂരിലെ ലിഫ്റ്റുകളുമാണ് ഉദ്ഘാടനം ചെയ്തത്.