തലശ്ശേരി: തലശ്ശേരി ജനറല്‍ ആശുപത്രിയില്‍ ആദിവാസി പ്രമോട്ടര്‍മാരായി സേവനം അനുഷ്ഠിക്കുന്ന നാലുപേരെ ഈമാസം ഒന്‍പതു മുതല്‍ മുന്നറിയിപ്പില്ലാതെ പിരിച്ചുവിട്ടു. എന്നാല്‍ സംസ്ഥാനത്തെ മുഴുവന്‍ ആശുപത്രികളിലുമായി പ്രമോട്ടര്‍മാരെ പിരിച്ചുവിട്ടിട്ടുണ്ടെന്നും ഇവരുടെ കാലാവധി പൂര്‍ത്തിയായതിനെതുടര്‍ന്നാണ് നടപടി എന്നുമാണ് ഔദ്യോഗിക വിശദീകരണം. ജനറല്‍ ആശുപത്രിയില്‍ കഴിഞ്ഞ നാലുവര്‍ഷമായി പ്രമോട്ടര്‍മാരായി ജോലി ചെയ്യുന്ന ബിനിഷ(കണ്ണവം), സുനില(പെരുവ), സീത(പെരുവ), ശാന്ത(കൈതേരി) എന്നിവരെയാണ് പിരിച്ചുവിട്ടത്. ആശുപത്രിയിലെത്തുന്ന ആദിവാസികള്‍ക്ക് ആവശ്യമായ സൗകര്യങ്ങള്‍ ചെയ്ത് കൊടുക്കുന്നത കാര്യങ്ങളാണ് പ്രമോട്ടര്‍മാര്‍ ചെയ്ത് വരുന്നത്. തലശ്ശേരി ജനറല്‍ ആശുപത്രിയില്‍ പ്രതിദിനം 25നും 30നും ഇടയില്‍ ആദിവാസികള്‍ എത്താറുണ്ട്. പ്രമോട്ടര്‍മാരുടെ അഭാവത്തില്‍ ആശുപത്രിയിലെത്തുന്ന ആദിവാസികള്‍ക്ക് യാതൊരു പരിഗണനയും ലഭിക്കുന്നുമില്ല. നേരത്തെ ഇത്തരം പരാതികള്‍ നിലനില്‍ക്കെയാണ് പിരിച്ചുവിടല്‍ നടപടി.