ന്യൂഡല്‍ഹി: നോട്ട് നിരോധനവുമായി ബന്ധപ്പെട്ട് കേന്ദ്ര ധനമന്ത്രി അരുണ്‍ ജയ്റ്റ്‌ലി ഉന്നയിച്ച അവകാശവാദങ്ങള്‍ക്ക് തെളിവുണ്ടോയെന്ന ചോദ്യവുമായി കോണ്‍ഗ്രസ് രംഗത്ത്. നോട്ട് പിന്‍വലിക്കല്‍ നടപടി മൂലം മാവോയിസ്റ്റുകള്‍ക്കും കശ്മീരിലെ വിഘടനാവാദികള്‍ക്കുമുള്ള ഫണ്ട് ലഭിക്കല്‍ അവസാനിച്ചുവെന്നായിരുന്നു ജയ്റ്റ്‌ലിയുടെ അവകാശവാദം.

എന്നാല്‍ ജയ്റ്റ്‌ലി ഒരു ഊഹാപോഹം മാത്രമാണ് പറഞ്ഞത്. ഇതിന് എന്തെങ്കിലും ശക്തമായ തെളിവുകള്‍ ഉണ്ടെങ്കില്‍ അദ്ദേഹം പുറത്തുകൊണ്ടുവരണമെന്നും കോണ്‍ഗ്രസ് നേതാവ് പി.സി ചാക്കോ പറഞ്ഞു. അദ്ദേഹത്തിന്റെ വാദത്തെ സാധൂകരിക്കുന്ന ശക്തമായ തെളിവ് ഹാജരാക്കാന്‍ അദ്ദേഹം തയാറാകണം.

ഞായറാഴ്ച മുംബൈയില്‍ ഒരു പരിപാടിയില്‍ പങ്കെടുക്കുന്നതിനിടെയാണ് നോട്ട് നിരോധനം മൂലം രാജ്യത്തെ വിവിധ ഇടങ്ങളില്‍ മാവോയിസ്റ്റുകളുടെ സാന്നിധ്യം അവസാനിപ്പിച്ചുവെന്നും കശ്മീരില്‍ തീവ്രവാദികള്‍ക്ക് ഫണ്ട് ലഭിക്കുന്നത് തടയാനായെന്നും പ്രസംഗിച്ചത്.