അരീക്കോട്: മുര്‍ക്കനാട് സുബുലുസ്സലാം ഹയര്‍ സെക്കന്‍ഡറി സ്‌കൂള്‍ എന്‍.എസ്.എസ് യൂനിറ്റിന്റെ നേതൃത്വത്തില്‍ ഭിന്നശേഷിക്കാര്‍ക്കായി നടപ്പാക്കുന്ന വിവിധ പദ്ധതികളുടെ ഭാഗമായി ഭിന്നശേഷി എംപ്ലോയ്‌മെന്റ് രജിസ്‌ട്രേഷന്‍ ക്യാംപ് സെപ്റ്റംപറില്‍ നടക്കും. ഇതിന്റെ ഏകജാലക രജിസ്‌ട്രേഷന്‍ ഉദ്ഘാടനം നിയമസഭാ സ്പീക്കര്‍ പി.ശ്രീരാമകൃഷ്ണന്‍ നിര്‍വഹിച്ചു. സ്‌കൂളില്‍ നടക്കുന്ന ക്യാംപില്‍ എടവണ്ണ, അരീക്കോട്, ഊര്‍ങ്ങാട്ടിരി, കാവനൂര്‍, കീഴുപറമ്പ്, കുഴിമണ്ണ, പുല്‍പ്പറ്റ പഞ്ചായത്തുകളിലെ അഞ്ഞൂറോളം ഭിന്നശേഷിക്കാര്‍ പങ്കെടുക്കും. പി.കെ ബഷീര്‍ എം.എല്‍.എ അധ്യക്ഷനായി. ഊര്‍ങ്ങാട്ടിരി പഞ്ചായത്ത് പ്രസിഡന്റ് എന്‍.കെ ഷൗക്കത്തലി, പ്രോഗ്രാം ഓഫിസര്‍ എം.കൃഷ്ണനുണ്ണി, ഹാമിദലി വാഴക്കാട്, അബ്ദു റഹൂഫ്, എന്‍.എസ്.എസ് അംഗങ്ങളായ മുഹമ്മദ് സബീഹ്, സാബിത്, ശാനി മോള്‍, മുഹമ്മദ് ഹിഷാം, അര്‍ച്ചന, ശാഹിദ് അമീന്‍ സംബന്ധിച്ചു.