മാഡ്രിഡ്: നിലവിലെ ചാംപ്യന്‍മാരായ റയല്‍ മാഡ്രിഡും മുന്‍ ചാംപ്യന്‍മാരായ ബാഴ്‌സലോണയും സ്പാനിഷ് ലാ ലിഗയിലെ പുതിയ സീസണിന് വിജയത്തോടെ തുടക്കമിട്ടു. റയല്‍ മറുപടിയില്ലാത്ത മൂന്ന് ഗോളുകള്‍ക്ക് ഡിപോര്‍ടീവോ ലാ കൊരുണയേയും ബാഴ്‌സലോണ മറുപടിയില്ലാത്ത രണ്ട് ഗോളുകള്‍ക്ക് റയല്‍ ബെറ്റിസിനേയും പരാജയപ്പെടുത്തി.
വിലക്കിനെ തുടര്‍ന്ന് സൂപ്പര്‍ താരം ക്രിസ്റ്റ്യാനോ റൊണാള്‍ഡോ വിട്ടുനിന്ന പോരാട്ടത്തില്‍ ഗെരത് ബെയ്ല്‍, കസെമിറോ, ടോണി ക്രൂസ് എന്നിവരാണ് റയലിനായി വല ചലിപ്പിച്ചത്. ആദ്യ മത്സരത്തില്‍ തന്നെ നായകന്‍ സെര്‍ജിയോ റാമോസിന് ചുവപ്പ് കാര്‍ഡ് കണ്ട് പുറത്ത് പോകേണ്ടി വന്നത് റയലിന് അല്‍പ്പം ക്ഷീണവുമായി. റയല്‍ കരിയറിലെ 23ാം ചുവപ്പ് കാര്‍ഡാണ് റാമോസിന് ലഭിച്ചത്.
കഴിഞ്ഞ ആഴ്ച സ്പാനിഷ് സൂപ്പര്‍ കപ്പില്‍ ബാഴ്‌സലോണയെ ഇരു പാദങ്ങളിലുമായി 5-1ന് തകര്‍ത്ത ടീമില്‍ നിന്ന് നാല് മാറ്റങ്ങള്‍ വരുത്തിയാണ് സിദാന്‍ ടീമിനെ വിന്ന്യസിപ്പിച്ചത്. കളി തുടങ്ങി ആദ്യ പത്ത് മിനുട്ടിനുള്ളില്‍ തന്നെ ഡിപോര്‍ടീവോയ്ക്ക് ഗോളടിക്കാന്‍ അവസരം ലഭിച്ചെങ്കിലും അത് മുതലാക്കുന്നതില്‍ അവര്‍ പരാജയപ്പെട്ടു. പതിയെ ആക്രമണം തുടങ്ങിയ റയലിന് അതിന്റെ ഫലം 20ാം മിനുട്ടില്‍ തന്നെ ലഭിച്ചു. കരിം ബെന്‍സമയുടെ ഗോള്‍ ശ്രമം ഡിപോര്‍ടീവോ ഗോള്‍ കീപ്പര്‍ കുത്തിയകറ്റിയപ്പോള്‍ ബോക്‌സിലേക്ക് കയറി നിന്ന ബെയ്‌ലിന് കണക്കാക്കി പന്ത് ലഭിച്ചു. പൊസിഷന്‍ തെറ്റി നിന്ന ഗോള്‍ കീപ്പറെ കബളിപ്പിച്ച് പന്ത് അനായാസം വലയിലാക്കാന്‍ വെയ്ല്‍സ് താരത്തിന് സാധിച്ചു. ഏഴ് മിനുട്ട് മാത്രം പിന്നിട്ടപ്പോള്‍ റയലിന്റെ രണ്ടാം ഗോള്‍. മാഴ്‌സലോയുടെ സുന്ദരമായൊരു പാസ്. ഇടത് വിങില്‍ നിന്ന് ബോക്‌സിലേക്ക് കയറിയ മാഴ്‌സലോ രണ്ട് ഡിപോര്‍ടീവോ താരങ്ങളെ ഡ്രിബിള്‍ ചെയ്ത് പന്ത് കൃത്യം വലയ്ക്ക് സമീപം നിന്ന കസെമിറോയ്ക്ക് ക്രോസ് ചെയ്ത് നല്‍കി. ഒഴിഞ്ഞ ഭാഗം നോക്കി കസെമിറോ പന്ത് വലയിലേക്ക് ചെത്തിയിട്ടു. രണ്ടാം പകുതിയുടെ 62ാം മിനുട്ടില്‍ ഗെരത് ബെയ്‌ലിന്റെ പാസില്‍ നിന്ന് മധ്യനിര താരം ടോണി ക്രൂസ് റയലിന്റെ മൂന്നാം ഗോളും നേടി. 89ാം മിനുട്ടില്‍ ഡിപോര്‍ടീവോയ്ക്ക് അനുകൂലമായി പെനാല്‍റ്റി ലഭിച്ചു. അന്‍ഡോണ്‍ എടുത്ത കിക്ക് റയല്‍ ഗോള്‍ കീപ്പര്‍ കെയ്‌ലര്‍ നവാസ് തടഞ്ഞതോടെ അവരുടെ ആശ്വാസത്തിനുള്ള വഴിയും അടഞ്ഞു. കളി അവസാന നിമിഷത്തിലേക്ക് കടന്നപ്പോഴാണ് റയല്‍ നായകന്‍ റാമോസ് രണ്ടാം മഞ്ഞ കാര്‍ഡും അതുവഴി ചുവപ്പും വാങ്ങി പുറത്തേക്ക് പോയത്. അവസാന നിമിഷങ്ങളില്‍ പത്ത് പേരായെങ്കിലും മൂന്ന് ഗോള്‍ വിജയത്തോടെ ചാംപ്യന്‍മാര്‍ സീസണ് മികച്ച തുടക്കമിട്ടു.
ബാഴ്‌സലോണ ആദ്യ പകുതിയില്‍ തന്നെ നേടിയ രണ്ട് ഗോളുകളുടെ ലീഡിലാണ് വിജയത്തുടക്കമിട്ടത്. കളിയുടെ 36ാം മിനുട്ടില്‍ റയല്‍ ബെറ്റിസ് താരം ടോസ്‌ക്കയുടെ സെല്‍ഫ് ഗോളാണ് ബാഴ്‌സയുടെ അക്കൗണ്ട് തുറന്നത്. മൂന്ന് മിനുട്ടിനുള്ളില്‍ സെര്‍ജി റോബര്‍ട്ടോയിലൂടെ രണ്ടാം ഗോളും വലയിലാക്കാന്‍ ബാഴ്‌സയ്ക്ക് സാധിച്ചു. സ്പാനിഷ് യുവ താരം ഡിയോല്‍ഫുവാണ് സെര്‍ജി റോബര്‍ട്ടോയുടെ ഗോളിന് വഴിയൊരുക്കിയത്. എന്റിക്വയ്ക്ക് പകരം പരിശീലക സ്ഥാനമേറ്റ വെല്‍വെര്‍ഡെയുടെ ബാഴ്‌സ കോച്ചെന്ന നിലയിലുള്ള ആദ്യ ലാ ലിഗ പോരാട്ടമെന്ന സവിശേഷതയും മത്സരത്തിനുണ്ടായിരുന്നു.