കരുനാഗപ്പള്ളി: ജില്ലാ ആശുപത്രിയില്‍ ചികിത്സയിലിരുന്ന രോഗിയെ അവിടുത്തെ ജീവനക്കാര്‍ കരുനാഗപ്പള്ളി താലൂക്കാശുപത്രിയില്‍ ഉപേക്ഷിച്ചു കടന്ന് കളഞ്ഞു.
ബന്ധുക്കളോ കൂട്ടിരിപ്പ് കാരോ ഇല്ലാത്ത തൊടിയൂര്‍ ബിനീഷ് ഭവനത്തില്‍ പൊടിയന്‍ (48) നെയാണ് ജില്ലാ ആശുപത്രിയില്‍ നിന്നും ആംബുലന്‍സില്‍  കൊണ്ടു വന്ന് ഉപേക്ഷിച്ചിട്ട് ജീവനക്കാര്‍ മുങ്ങിയത്. ബന്ധുക്കളാരും നോക്കാനില്ലാതെ  പൊടിയന്‍   പുതിയകാവ് നെഞ്ച് രോഗ ആശുപത്രിയില്‍ ചികിത്സയിലായിരുന്നു. രണ്ടാഴ്ച മുന്‍പ് രോഗം മൂര്‍ഛിച്ചതിനെ തുടര്‍ന്ന്  അവിടെ നിന്ന്  ജില്ലാ ആശുപത്രിയിലേക്ക് മാറ്റുകയായിരുന്നു.നാല് ദിവസമായി ഇവിടെ ചികിത്സയിലാരുന്നു. ഇതിനിടെയാണ് ചില ജീവനക്കാര്‍ ചേര്‍ന്ന് പൊടിയനെ താലൂക്കാശുപത്രിയില്‍ കൊണ്ടുവന്നു ഉപേക്ഷിച്ചത്.
ജില്ലാ ആശുപത്രിയില്‍ അനാഥ  രോഗികളെ പരിചരിക്കാനും മറ്റുമായി വേണ്ട സൗകര്യവും പ്രത്യേക മുറികളും ഉണ്ടായിരിക്കെയാണ് അസൗകര്യമുള്ള താലൂക്കാശുപത്രിയില്‍ രോഗിയെ ഉപേക്ഷിച്ചത്.  താലൂക്കാശുപത്രി അധികൃതര്‍  
കരുനാഗപ്പള്ളി പൊലിസില്‍  വിവരമറിയിച്ചു.   ജില്ലാ ആശുപത്രി ജീവനക്കാരുടെ  നടപടിക്കെതിരെ വ്യാപക പ്രതിഷേധമുയര്‍ന്നിട്ടുണ്ട്.