കോഴിക്കോട്: ഹരിയാനയിലെ വിവാദ ആള്‍ ദൈവം ഗുര്‍മീത് റാം റഹിം സിങ്ങിനെ ബലാത്സംഗത്തിന് ശിക്ഷ വിധിച്ചപ്പോള്‍ ഉത്തരേന്ത്യന്‍ സംസ്ഥാനങ്ങളിലാണ് വന്‍ സുരക്ഷ ഒരുക്കിയത്. എന്നാല്‍ കേരളമടക്കം എല്ലാ സംസ്ഥാനങ്ങളിലും ഇയാള്‍ക്ക് ലക്ഷക്കണക്കിന് അനുയായികളുണ്ട്. 2012 ല്‍ കേരളം സന്ദര്‍ശിക്കാനെത്തിയ ഗുര്‍മീത് കോഴിക്കോടും സന്ദര്‍ശിച്ചിരുന്നു. നൂറു കണക്കിന് വാഹനവും സുരക്ഷാഭടന്‍മാരും അനുയായികളുമടങ്ങിയ ഇയാളുടെ സംഘത്തെ കൗതുകത്തോടെയായിരുന്നു അന്ന് കോഴിക്കോട്ടുകാര്‍ കണ്ടത്. വയനാട്ടില്‍ സുഖചികിത്സയും വിശ്രമമവും കഴിഞ്ഞാണ് ഗുര്‍മീത് കോഴിക്കോട്ടേക്ക് യാത്ര തിരിച്ചത്. നഗരത്തിലെ റാം മോഹന്‍ റോഡിലേയും മാവൂര്‍ റോഡിലേയും വ്യാപാരസ്ഥാപനങ്ങളിലും നഗരത്തിലെ ചില മാളുകളിലും ഷോപ്പിങ് നടത്തി ഗുര്‍മീതും സംഘവും മടങ്ങിയത് കുമരകത്തേക്കായിരുന്നു.