കാക്കനാട്: രോഗികളുടെ തൂക്കം അളക്കുന്ന ഉപകരണങ്ങള്‍ നിയമാനുസൃതം പരിശോധന നടത്തി ലീഗല്‍ മെട്രോളജിയുടെ സര്‍ട്ടിഫിക്കറ്റില്ലാതെ ഉപയോഗിച്ചിന് 18 വന്‍കിട സ്വകാര്യ ആശുപത്രികള്‍ക്കെതിരേ കേസ്. എറണാകുളം നഗരത്തിലാണ് കൂടുതല്‍ ആശുപത്രികള്‍ പരിശോധനയില്‍ കുടുങ്ങിയത്. ആറെണ്ണം. തൃശ്ശൂര്‍, പാലക്കാട്,ഇടുക്കി ജില്ലകളില്‍ പ്രവര്‍ത്തിക്കുന്ന ആശുപത്രികള്‍ക്കെതിരെയാണ് ബാക്കി കേസുകള്‍ രജിസ്റ്റര്‍ ചെയ്തിട്ടുള്ളത്. വന്‍കിട ആശുപത്രികളില്‍ ഉള്‍പ്പെടെ വെയിങ് മെഷീനുകള്‍ നിയമ പ്രകാരം രജിസ്റ്റര്‍ ചെയ്യാതെയാണ് ഉപയോഗിക്കുന്നതെന്ന പരാതിയുടെ അടിസ്ഥാനത്തിലാണ് ലീഗല്‍ മെട്രോളജി പരിശോധന നടത്തിയത്. കാലാവധി കഴിഞ്ഞ വെയിങ് മെഷീനുകളാണ് പരിശോധന നടത്തിയ ആശുപത്രികളില്‍ ഉപയോഗിച്ചിരുന്നതെന്നും കണ്ടെത്തിയിട്ടുണ്ട്. 

കാലാകാലങ്ങളില്‍ ലീഗല്‍ മെട്രോളജിയില്‍ വെയിങ് മെഷീനുകള്‍ പരിശോധന നടത്തി തൂക്കത്തിലെ കൃത്യത ഉറപ്പ് വരുത്തേണ്ടത് അതത് ആശുപത്രികളിലെ ഡോക്ടര്‍മാരുടെ ചുമതലയാണ്. ആശുപത്രി ഉടമകള്‍, ഡയറക്ടര്‍മാര്‍, മാനേജര്‍മാര്‍ എന്നിവര്‍ക്കെതിരെ ഫൈന്‍ ചുമത്താനാണ് ലീഗല്‍ മെട്രോളജിയുടെ തീരുമാനം.