തിരുവനന്തപുരം: കിഫ്ബി മുഖാന്തരം നടപ്പിലാക്കുന്ന തീരദേശ, മലയോര ഹൈവേകള്‍ക്കായി 12,000 കോടി രൂപയുടെ പദ്ധതി തയാറാക്കിയിട്ടുണ്ടെന്ന് ധനമന്ത്രി ഡോ. ടി. എം. തോമസ് ഐസക്ക്.
അടിസ്ഥാന സൗകര്യ വികസന പദ്ധതികള്‍ക്കായി ഇനിയുള്ള കാലത്ത് കൂടുതലും നിക്ഷേപം കണ്ടെത്തേണ്ടിവരിക മൂലധന വിപണിയില്‍ നിന്നാണ്. ഈ നിക്ഷേപസമാഹരണത്തിന് ഒരു സംവിധാനം ആവശ്യമുണ്ട്. അതാണ് കിഫ്ബി. ടോള്‍ പിരിച്ചുകൊണ്ടുള്ള വരുമാനമാതൃക കേരളത്തില്‍ പ്രായോഗികമല്ലെന്നും കിഫ്ബി സംഘടിപ്പിച്ച ഉന്നതതല ദേശീയ സെമിനാറിന്റെ ഭാഗമായി ഡോ.ഐസക് മാധ്യമപ്രവര്‍ത്തകരോടു പറഞ്ഞു.
നിലവില്‍ കിഫ്ബി വഴി അംഗീകരിച്ചുകഴിഞ്ഞ 6,000 കോടി രൂപയുടെ പദ്ധതികള്‍ ടെന്‍ഡറിന് തയാറായിട്ടുണ്ട്. കിഫ്ബി പ്രവര്‍ത്തനത്തിന്റെ രണ്ടാംഘട്ടത്തിലേക്ക് കടക്കുകയാണ്. അതിന്റെ പ്രാരംഭനടപടി എന്ന നിലയ്ക്കാണ് ബാങ്കിങ്, നിക്ഷേപം, സെബി, കിഫ്ബി മാതൃകയിലുള്ള വിവിധ സര്‍ക്കാര്‍ സ്ഥാപനങ്ങള്‍ എന്നിവയുടെ പ്രതിനിധികള്‍ പങ്കെടുത്ത സെമിനാര്‍ നടത്തിയത്.
ഈ സാമ്പത്തികവര്‍ഷം തന്നെ കിഫ്ബി 25,000 കോടി രൂപയുടെ പദ്ധതികള്‍ അംഗീകരിക്കുമെന്നും അദ്ദേഹം പറഞ്ഞു. തിരിച്ചടവ് ഉറപ്പാക്കിക്കൊണ്ടാണ് കിഫ്ബിയുടെ ധനമാതൃകയെന്നും സെമിനാറിലെ അധ്യക്ഷപ്രസംഗത്തില്‍ മന്ത്രി വ്യക്തമാക്കി.