ന്യൂഡല്‍ഹി: ആര്‍.ജെ.ഡി അധ്യക്ഷന്‍ ലാലു പ്രസാദ് യാദവ് നയിക്കുന്ന ബി.ജെ.പി വിരുദ്ധ റാലിയില്‍ പങ്കെടുത്താല്‍ ശരത് യാദവിനെ പുറത്താക്കുമെന്ന് ജെ.ഡി.യു ജനറല്‍ സെക്രട്ടറി കെ.സി ത്യാഗി. രാജ്യസഭയില്‍ ശരത് യാദവിന്റെ അയോഗ്യതയ്ക്കായി പാര്‍ട്ടി നോട്ടിസ് നല്‍കുമെന്നും ത്യാഗി മുന്നറിയിപ്പ് നല്‍കി.
പാറ്റ്‌നയില്‍ ഇന്ന് നടക്കുന്ന റാലിയില്‍ പങ്കെടുക്കുമെന്ന് ശരത് യാദവ് പ്രഖ്യാപിച്ചിട്ടുണ്ട്. ഇത് പാര്‍ട്ടിയില്‍ നിന്നുള്ള അദ്ദേഹത്തിന്റെ സ്വയം വിരമിക്കലായി കണക്കാക്കുമെന്ന് യാദവിനയച്ച കത്തില്‍ ത്യാഗി വ്യക്തമാക്കി. പാര്‍ട്ടിച്ചട്ടങ്ങള്‍ യാദവ് തുടര്‍ച്ചയായി ലംഘിച്ചുകൊണ്ടിരിക്കുകയാണ്. നിതീഷ് കുമാറിന്റെ നയങ്ങളെയും ബി.ജെ.പിക്കുള്ള പിന്തുണ പ്രഖ്യാപിച്ചതിലും പാര്‍ട്ടിയെ വിമര്‍ശിച്ച യാദവിന്റെ നയങ്ങള്‍ അച്ചടക്കലംഘനമായി കണക്കാക്കുമെന്നും ദേശീയ എക്‌സിക്യൂട്ടീവില്‍ പങ്കെടുക്കാതിരുന്നത് ഗുരുതര കുറ്റമാണെന്നും ത്യാഗി ആരോപിച്ചു.
ഭരണഘടന പ്രകാരം പാര്‍ട്ടി എം.പിയായ യാദവിനെ സഭയില്‍ നിന്ന് അയോഗ്യനാക്കുന്ന കാര്യവും പരിഗണനയിലുണ്ടെന്നും ത്യാഗി കൂട്ടിച്ചേര്‍ത്തു. അതേസമയം എന്തുവിലകൊടുത്തും റാലിയില്‍ പങ്കെടുക്കുമെന്ന് യാദവ് സൂചിപ്പിച്ചു.
ബംഗാള്‍ മുഖ്യമന്ത്രി മമതാ ബാനര്‍ജി, കോണ്‍ഗ്രസ് നേതാവായ ഗുലാം നബി ആസാദ്, സമാജ്‌വാദി അധ്യക്ഷന്‍ അഖിലേഷ് യാദവ്, എന്നീ പ്രമുഖര്‍ ലാലുവിന്റെ ബി.ജെ.പി ഒഴിവാക്കൂ രാജ്യത്തെ രക്ഷിക്കൂ എന്ന റാലിയില്‍ പങ്കെടുക്കുന്നുണ്ട്. എന്നാല്‍ ബി.എസ്.പി അധ്യക്ഷ മായാവതി റാലിയില്‍ പങ്കെടുക്കില്ലെന്ന് അറിയിച്ചിട്ടുണ്ട്.