തിരുവനന്തപുരം: ഓണത്തിന് മുന്‍പ് കൂടുതല്‍ മദ്യശാലകള്‍ തുറക്കാന്‍ സര്‍ക്കാര്‍ നീക്കം. ഇതിന്റെ ഭാഗമായി ത്രീ സ്റ്റാറിന് മുകളിലുള്ള 130 ബാറുകള്‍ക്ക് ലൈസന്‍സ് നല്‍കാനുള്ള അടിയന്തര നടപടി എക്‌സൈസ് ആരംഭിച്ചു.
മദ്യശാലകളുടെ ദൂരപരിധി 200ല്‍നിന്ന് 50 മീറ്ററാക്കാനും ശ്രമമുണ്ട്. ദേശീയ, സംസ്ഥാന പാതകളുടെ സമീപത്തുള്ള 466 മദ്യശാലകള്‍ തുറക്കാന്‍ കഴിഞ്ഞദിവസം അനുമതി നല്‍കിയിരുന്നു. ഇതിന്റെ ചുവടുപിടിച്ചാണ് കൂടുതല്‍ ബാറുകള്‍ക്ക് ലൈസന്‍സ് നല്‍കാനുള്ള നീക്കം ശക്തമാക്കിയത്. നിലവില്‍ ഫൈവ് സ്റ്റാര്‍ ഉള്‍പ്പടെ 121 ബാറുകളാണ് സംസ്ഥാനത്തുള്ളത്. ഇവയ്ക്കുപുറമേ 130 എണ്ണത്തിന് കൂടി അനുമതി നല്‍കാനുള്ള നീക്കമാണ് നടക്കുന്നത്.
സുപ്രിംകോടതി ഉത്തരവില്‍ വ്യക്തത വരുത്തണമെന്നാവശ്യപ്പെട്ട് എക്‌സൈസ് കമ്മിഷണര്‍ നല്‍കിയ കത്തിന്റെ അടിസ്ഥാനത്തില്‍ അഡിഷനല്‍ ചീഫ് സെക്രട്ടറി ടോം ജോസ് മദ്യശാലകള്‍ തുറക്കുന്നതിനുള്ള അനുമതിനല്‍കി ഉത്തരവിറക്കിയിരുന്നു. ഇതിനുപിന്നാലെയാണ് ബാര്‍ ലൈസന്‍സിനായുള്ള നിരവധി അപേക്ഷകള്‍ ഓണ്‍ലൈനായി ലഭിച്ചിട്ടുള്ളത്. ത്രീ സ്റ്റാറിന് മുകളിലുള്ളവക്ക് ലൈസന്‍സ് നല്‍കാന്‍ സര്‍ക്കാര്‍ നിര്‍ദേശിച്ചിട്ടുണ്ട്.
അപേക്ഷകളില്‍ ഉടന്‍ പരിശോധന നടത്തി അര്‍ഹതയുള്ളവര്‍ക്കെല്ലാം ലൈസന്‍സ് നല്‍കാന്‍ എക്‌സൈസ് കമ്മിഷണര്‍ ഡെപ്യൂട്ടി കമ്മിഷണര്‍മാര്‍ക്ക് നിര്‍ദേശം നല്‍കിയിട്ടുണ്ട്. ഇതിന്റെ അടിസ്ഥാനത്തില്‍ ഡെപ്യൂട്ടി കമ്മിഷണര്‍മാര്‍ ലൈസന്‍സ് നല്‍കാനുള്ള പരിശോധന തുടങ്ങിക്കഴിഞ്ഞു. മൂന്നുദിവസം കൊണ്ട് പരിശോധന പൂര്‍ത്തീകരിച്ച് ലൈസന്‍സ് നല്‍കാന്‍ കഴിയുമെന്ന് എക്‌സൈസ് ഉദ്യോഗസ്ഥര്‍ പറഞ്ഞു. ഫോര്‍ സ്റ്റാര്‍, ഫൈവ് സ്റ്റാര്‍ ബാറുകള്‍ക്ക് വേണ്ടിയാണ് ദൂരപിരിധി മാനദണ്ഡത്തില്‍ മാറ്റംവരുത്താന്‍ സര്‍ക്കാര്‍ നീക്കം തുടങ്ങിയത്. വിദ്യാലയങ്ങളുടെയും ആരാധനാലയങ്ങളുടെയും സമീപത്ത് നിലവില്‍ മദ്യശാലകള്‍ പ്രവര്‍ത്തിക്കണമെങ്കില്‍ 200 മീറ്റര്‍ ദൂരപരിധി പാലിക്കണം. എന്നാല്‍, ഇത് 50 മീറ്ററാക്കി കുറയ്ക്കാനാണ് സര്‍ക്കാര്‍ ഒരുങ്ങുന്നത്. നിലവിലെ ചട്ടത്തില്‍ മാറ്റംവരുത്തി മദ്യലോബിയെ സഹായിക്കാനുള്ള ശ്രമങ്ങള്‍ ഊര്‍ജിതമാക്കുകയാണ് സര്‍ക്കാര്‍.