മാനന്തവാടി: കേരള-കര്‍ണാടക അതിര്‍ത്തിയായ തോല്‍പ്പെട്ടി ചെക്ക് പോസ്റ്റ് വഴി കാറില്‍ ബ്രൗണ്‍ഷുഗര്‍ കടത്തുകയായിരുന്ന അഞ്ചുപേരെ എക്‌സൈസ് അറസ്റ്റ് ചെയ്തു.
കോഴിക്കോട് മാങ്കാവ് കെ മന്‍സൂര്‍(41), നല്ലളം പ്രണവ്(22), കോട്ടപ്പറമ്പ് സാജിദ്(23), വെള്ളയില്‍ നാഷ് ഫ്രാന്‍സിസ്(31), ഒളവണ്ണ ജിഷ്ണു(22) എന്നിവരാണ് എക്‌സൈസ് നടത്തിയ വാഹന പരിശോധയില്‍ പിടിയിലായത്. പ്രതികളെ ചോദ്യം ചെയ്തുവരുന്നതായി എക്‌സൈസ് സി.ഐ ടി ശശികുമാര്‍ പറഞ്ഞു. പ്രതികളില്‍ നിന്ന് 90 ഗ്രാം ബ്രൗണ്‍ഷുഗര്‍ കണ്ടെടുത്തു. കര്‍ണാടകയിലെ കൂര്‍ഗില്‍ നിന്ന് കോഴിക്കോട് വില്‍പ്പന നടത്തുന്നതിന് കൊണ്ടു പോകുന്നതിനിടയിലാണ് എക്‌സൈസ് സംഘത്തിന്റെ പിടിയിലാകുന്നത്.
കോഴിക്കോട് മയക്കുമരുന്ന് വില്‍പ്പന നടത്തുന്ന സംഘത്തിലെ കണ്ണികളാണ് ഇവരെന്ന് സൂചനയുണ്ടെന്നും എക്‌സൈസ് ഉദ്യോഗസ്ഥര്‍ പറഞ്ഞു. അസിസ്റ്റന്റ് ഇന്‍സ്‌പെക്ടര്‍ എം ബാലകൃഷ്ണന്‍, പ്രിവന്റിവ് ഓഫിസര്‍ ബാബു കൃഷ്ണന്‍, വിപിന്‍, അജേഷ് എന്നിവര്‍ ചേര്‍ന്നാണ് പ്രതികളെ പിടികൂടിയത്.