കല്‍പ്പറ്റ: കലാ-കായിക-പ്രവൃത്തിപരിചയ പാഠപുസ്തകം വിതരണം പൂര്‍ത്തിയാക്കാതെ ജില്ലയിലെ അഞ്ചാം ക്ലാസ് മുതല്‍ ഒമ്പതാം ക്ലാസ് വരെയുള്ള വിദ്യാര്‍ഥികള്‍ക്ക് പരീക്ഷ എഴുതാനുണ്ടായ സാഹചര്യമൊഴിവാക്കാന്‍ അടിയന്തര പരിഹാരമുണ്ടാക്കുമെന്നും പാഠപുസ്തക വിതരണം ഉടന്‍ പൂര്‍ത്തിയാക്കുമെന്നും ജില്ലാ വിദ്യാഭ്യാസ ഉപഡയറക്ടര്‍ എം.ബാബുരാജന്‍ ഉറപ്പുനല്‍കി.
ജില്ലയിലെ അംഗീകൃത അധ്യാപക സംഘടനാ പ്രതിനിധികളുടെയും വിദ്യാഭ്യാസ ഓഫിസര്‍മാരുടെയും സംയുക്ത യോഗത്തിലാണ് ഡി.ഡി.ഇ ഉറപ്പ് നല്‍കിയത്. കലാ-കായിക-പ്രവൃത്തിപരിചയ പാഠപുസ്തക വിതരണം ജില്ലയില്‍ നടക്കാത്തതിനാല്‍ പുസ്തകം കാണാതെയാണ് കുട്ടികള്‍ പരീക്ഷയെഴുതുന്നതെന്നും സ്‌പെഷലിസ്റ്റ് അധ്യാപക നിയമനം പൂര്‍ത്തിയാക്കാത്തതിനാല്‍ പാഠഭാഗങ്ങള്‍ ഏതൊക്കെയാണെന്നും അറിയാതെയാണ് കുട്ടികള്‍ പരീക്ഷയെഴുതുന്നത്.
എഴുതിയ ഉത്തര പേപ്പര്‍ സ്‌പെഷ്യലിസ്റ്റ് അധ്യാപകരില്ലാത്തതിനാല്‍ എങ്ങനെ മൂല്യനിര്‍ണയം നടത്തുമെന്നറിയാതെ പ്രധാനാധ്യാപകര്‍ പ്രയാസപ്പെടുകയാണെന്നും ഇതൊഴിവാക്കാന്‍ അടിയന്തര ഇടപെടല്‍ വേണമെന്ന് അധ്യാപക സംഘടനാ പ്രതിനിധികളുടെയും വിദ്യാഭ്യാസ ഓഫിസര്‍മാരുടെയും സംയുക്ത യോഗത്തില്‍ കെ.എസ്.ടി.യു ജില്ലാ പ്രസിഡന്റ് പി.പി മുഹമ്മദ് ആവശ്യപ്പെട്ടു.
ഇതിനെ തുടര്‍ന്നാണ് വിദ്യാഭ്യാസ ഓഫിസര്‍ നടപടി തുടങ്ങിയത്. പാഠപുസ്തകം കാണാതെയാണ് കുട്ടികള്‍ പരീക്ഷക്ക് ഉത്തരം എഴുതുന്നത്.
പാദവാര്‍ഷിക പരീക്ഷ ഓഗസ്റ്റ് 21 തുടങ്ങി 30ന് അവസാനിക്കും. കലാ- കായികം-പ്രവൃത്തിപരിചയം മൂന്ന് വിഷയങ്ങള്‍ക്കായി 120 മാര്‍ക്കിന്റെ പരീക്ഷയാണ് നടക്കുന്നത്. രണ്ട് മണിക്കൂര്‍ സമയമാണ് പരീക്ഷക്ക് നിശ്ചയിച്ചത്. 15 മാര്‍ക്ക് വീതം എഴുത്ത് പരീക്ഷയും 25 മാര്‍ക്ക് വീതം പ്രായോഗിക പരീക്ഷയുമാണ് നടത്തേണ്ടത്.