ചേര്‍ത്തല: ഉല്‍പാദനം നിലച്ച രണ്ട് വര്‍ഷമായി പ്രവര്‍ത്തനമില്ലാതെ കിടക്കുന്ന വാരനാട് മാക്ഡവല്‍ കമ്പനി തുറന്ന് പ്രവര്‍ത്തിപ്പിക്കുമെന്ന് എക്‌സൈസ് മന്ത്രി ടി പി രാമകൃഷ്ണന്‍. കമ്പനിയിലെത്തി തൊഴിലാളികളുമായി കൂടിക്കാഴ്ച നടത്തി സ്ഥിതിഗതികള്‍ മനസിലാക്കിയശേഷം സംസാരിക്കുകയായിരുന്നു അദ്ദേഹം.
സര്‍ക്കാര്‍ നടപടികളുടെ ഭാഗമായി കമ്പനി മാനേജ്‌മെന്റുമായി ബുധനാഴ്ച ചര്‍ച്ച നടത്തുമെന്നും മന്ത്രി പറഞ്ഞു.കമ്പനിയില്‍ ഉല്‍പാദനം ആരംഭിക്കണമെന്നാണ് സര്‍ക്കാര്‍ നിലപാട്. അനിശ്ചിതമായി ഇന്നത്തെ അവസ്ഥ തുടരാന്‍ സര്‍ക്കാര്‍ അനുവദിക്കില്ല.
ഉല്‍പ്പന്നങ്ങള്‍ പൂര്‍ണമായി ബിവറേജസ് കോര്‍പറേഷന്‍ എടുക്കുന്നതിന് സര്‍ക്കാര്‍ നടപടി ഉണ്ടാകുമെന്ന് നേരത്തെ മാനേജ്‌മെന്റുമായി സംസാരിച്ചപ്പോള്‍ വ്യക്തമാക്കിയതാണ്. സ്ഥാപനം പ്രവര്‍ത്തിപ്പിക്കുന്നതിന് മറ്റെന്ത് സഹായമാണ് വേണ്ടതെന്ന് അറിയിക്കാന്‍ അവരോട് നിര്‍ദേശിക്കുകയും ചെയ്തു.
അതിന്റെ തുടര്‍ച്ചയാണ് ബുധനാഴ്ചത്തെ ചര്‍ച്ച. മാനേജ്‌മെന്റിന്റെ ഭാഗം കേട്ടതിനുശേഷം തുടര്‍നടപടി സര്‍ക്കാര്‍ സ്വീകരിക്കും.
കെ ആര്‍ ഗൗരിയമ്മ കൂടി ഉള്‍പ്പെട്ട 1957 ലെ മന്ത്രിസഭയുടെ കാലയളവിലാണ് മാക്ഡവല്‍ കമ്പനി സ്ഥാപിച്ചത്. അതുമായി ബന്ധപ്പെട്ട കാര്യങ്ങള്‍ ഗൗരിയമ്മയുമായി സംസാരിച്ച് മനസിലാക്കി. സ്ഥാപനത്തിന്റെ നടത്തിപ്പിന് തൊഴിലാളികളുടെ സഹകരണം ഉറപ്പാക്കാന്‍ സര്‍ക്കാര്‍ സാധ്യമായതെല്ലാം ചെയ്യുമെന്ന് അവരെ അറിയിച്ചിട്ടുണ്ടെന്നും മന്ത്രി പറഞ്ഞു.
ഇന്നലെ ഉച്ചയോടെ കമ്പനിയിലെത്തിയ മന്ത്രി ട്രേഡ് യൂണിയന്‍ പ്രതിനിധികളുമായി ആശയവിനിമയം നടത്തി. തുടര്‍ന്ന് തൊഴിലാളികളുമായി സംസാരിക്കുകയും ചെയ്തു. തൊഴിലാളികള്‍ ജീവിത പ്രയാസങ്ങള്‍ അദ്ദേഹത്തോട് വിവരിച്ചു. അനുബന്ധ സ്ഥാപനമായ യുണൈറ്റഡ് ബ്രിവറീസിലെ വിവരങ്ങള്‍ അധികൃതരോട് മന്ത്രി ചോദിച്ചറിഞ്ഞു.
126 സ്ഥിരംതൊഴിലാളികളും 162 കരാര്‍ തൊഴിലാളികളും ഉള്ള മാക്ഡവല്‍ കമ്പനിയില്‍ രണ്ട് വര്‍ഷത്തിലേറെയായി ഉല്‍പാദനമില്ല. വിദേശകമ്പനി 'പിയാജിയോ' ഉടമസ്ഥരായപ്പോഴാണ് ഉല്‍പാദനം നിര്‍ത്തിയത്.
ലാഭകരമല്ലായെന്ന ന്യായമാണ് അവര്‍ ഉയര്‍ത്തുന്നത്. ഒമ്പത് മാസമായി സ്ഥിരംതൊഴിലാളികള്‍ക്ക് ശമ്പളം നല്‍കുന്നില്ല. കരാര്‍ തൊഴിലാളികള്‍ക്ക് പണിയില്ല. 350ല്‍പരം സ്ഥിരംതൊഴിലാളികള്‍ ജോലിചെയ്ത സ്ഥാപനമാണിത്. ഈ സാഹചര്യത്തിലാണ് സര്‍ക്കാര്‍ ഇടപെടുന്നത്.