കൊല്ലം: ആശ്രാമം മൈതാനത്തിന്റെ യൂസേഴ്‌സ് ഫീ വര്‍ധനക്കെതിരേ കൗണ്‍സിലര്‍മാര്‍ രംഗത്തെത്തി.
ഇന്നലെ നടന്ന കോര്‍പ്പറേഷന്റെ സാധാരണ യോഗത്തിലാണ് ഭരണപ്രതിപക്ഷ ഭേദമന്യേ ഭീമമായ യൂസേഴ്‌സ് ഫീ വര്‍ധനക്കെതിരേ കൗണ്‍സിലര്‍മാര്‍ പ്രതിഷേധമുയര്‍ത്തിയത്.
ഡ്രൈവിങ് പരിശീലനത്തിനുള്‍പ്പടെ ആയിരങ്ങളാണ് ആശ്രാമം മൈതാനം ഉപയോഗിക്കുന്നത്.രണ്ട് വര്‍ഷം മുന്‍പ് വരെ പരിമിതമായ ഫീസ് ഈടാക്കിയിരുന്നെങ്കില്‍ പൊടുന്നനെ എഴുപത് രൂപക്കുമേലാണ് വര്‍ധനവ് വരുത്തിയിരിക്കുന്നതെന്ന് അംഗങ്ങള്‍ ചൂണ്ടിക്കാട്ടി.മൈതാനം മിതമായ ഫീസില്‍ ഉപയോഗിക്കാനുള്ള നടപടി സ്വീകരിക്കണം. ജില്ലാ ഭരണകൂടത്തിന്റെ കൊള്ളക്കെതിരേ കൗണ്‍സില്‍ ഒന്നടങ്കം പ്രതിഷേധിച്ചതോടെ വര്‍ധന പിന്‍വലിക്കാന്‍ നടപടി സ്വീകരിക്കാന്‍ ആവശ്യപ്പെടാനും കൗണ്‍സിലില്‍ തീരുമാനമായി.യോഗത്തില്‍ ചര്‍ച്ച തുടങ്ങിവച്ചത് യു.ഡി.എഫ് പാര്‍ലമെന്ററിപാര്‍ട്ടി നേതാവ് എ.കെ ഹഫീസാണ്.
കൗണ്‍സിലില്‍ നടക്കുന്ന ചര്‍ച്ചകള്‍ക്കൊടുവില്‍ എടുക്കുന്ന തീരുമാനങ്ങള്‍ നടപ്പാക്കുന്നതില്‍ വിമുഖത നേതൃത്വം കാണിക്കുകയാണെന്ന് അദ്ദേഹം ആരോപിച്ചു.
നഗരപരിധിയില്‍ ജില്ലാ ആശുപത്രിക്ക് മുന്‍പിലുള്‍പ്പടെ അനധികൃത തട്ടുകടകള്‍ വ്യാപകമായിട്ടും നടപടി ഇല്ല. പി.എം.എ.വൈ പദ്ധതിയില്‍ സി.ആര്‍ ഇസഡ് പ്രശ്‌നം കേന്ദ്രത്തിന്റെ ഉത്തരവ് ആവശ്യമെങ്കില്‍ നേടിയെടുക്കാന്‍ ശ്രമം നടത്തണമെന്നും ഹഫീസ് മേയറോട് ആവശ്യപ്പെട്ടു.
വാഗ്ദാനങ്ങള്‍ മാത്രമാണ് കൗണ്‍സിലില്‍ നടക്കുന്നതെന്നും ചീത്തവിളി കേള്‍ക്കാന്‍മാത്രം വിധിക്കപ്പെട്ട കൗണ്‍സിലര്‍മാരാണ് നിലവിലുള്ളതെന്നും തുടര്‍ന്ന് സംസാരിച്ച മീനാകുമാരി പറഞ്ഞു.
കൗണ്‍സിലിലെ തീരുമാനങ്ങള്‍ നടപ്പാക്കുന്നതില്‍ ഉദ്യോഗസ്ഥര്‍ കാണിക്കുന്ന മെല്ലെപ്പോക്ക് അവസാനിപ്പിക്കണമെന്നും രാജ്‌മോഹന്‍ ചൂണ്ടിക്കാട്ടി.
ലൈറ്റുകള്‍ പ്രകാശിപ്പിക്കുന്നതിന് അടിയന്തിര നടപടി സ്വീകരിക്കണമെന്ന് ബെര്‍ളിനും തകര്‍ന്ന കിടക്കുന്ന പി.ഡബ്ല്യൂ റോഡുകളുടെ ശോച്യാവസ്ഥ പരിഹരിക്കാന്‍ അവലോകനയോഗം വിളിക്കണമെന്നും മിനിമം ബാലന്‍സില്ലാതെ ബ്ലോക്കായി കിടക്കുന്ന ബാങ്ക് അക്കൗണ്ടുകളിലേക്ക് പെന്‍ഷന്‍ തുക ലഭ്യമാക്കാന്‍ അടിയന്തിര നടപടി സ്വീകരിക്കണമെന്ന് ഗോപകുമാറും ആവശ്യപ്പെട്ടു.2015ല്‍ നല്‍കിയ പെന്‍ഷന്‍ അപേക്ഷകളില്‍ നാളിതുവരെ തുക നല്‍കിയിട്ടില്ലെന്ന് അജിത്ത്കുമാര്‍ ആരോപിച്ചു.
വര്‍ക്‌സ് കമ്മിറ്റികളില്‍ ഏകോപനപ്രവര്‍ത്തനങ്ങള്‍ നടക്കുന്നില്ലെന്നും പുതിയ കലക്ടര്‍ ചാര്‍ജ്ജെടുത്താല്‍ ആശ്രാമം മൈതാനത്തിന്റെ ഫീസ് വര്‍ധന പിന്‍വലിക്കാന്‍ അടിയന്തിര ഇടപെടല്‍ നടത്തുമെന്നും മേയര്‍ രാജേന്ദ്ര ബാബു കൗണ്‍സിലിനെ അറിയിച്ചു. ഡെ. മേയര്‍ വിജയ. ഫ്രാന്‍സീസ്, സെക്രട്ടറി രാജു, ഉദ്യോഗസ്ഥര്‍ പങ്കെടുത്തു.