തിരുവനന്തുപുരം: സ്‌കൂള്‍ കലോല്‍സവത്തില്‍ ഗ്രേസ്മാര്‍ക്ക് ഒഴിവാക്കണമെന്ന് ശുപാര്‍ശ. കലോല്‍സവ നിയമാവലി പരിഷ്‌ക്കരിക്കുന്നതിന്റെ ഭാഗമായാണ് എസ്.സി.ഇ.ആര്‍.ടി, വിദ്യാഭ്യാസ വകുപ്പിന് ശുപാര്‍ശ നല്‍കിയത്.

നൃത്ത ഇനങ്ങളില്‍ അമിത ആഡംബരം കാണിക്കുന്ന മത്സരാര്‍ഥികള്‍ക്ക് നെഗറ്റിവ് മാര്‍ക്ക് നല്‍കണമെന്നും സമിതി നിര്‍ദ്ദേശിച്ചു. ഇവ സംബന്ധിച്ച് അധ്യാപക സംഘടനകളുമായി 13ാം തീയതി ചര്‍ച്ച നടത്തും.

കൂടാതെ വിധികര്‍ത്താക്കളെ തീരുമാനിക്കുന്നതില്‍ കര്‍ശന മാനദണ്ഡങ്ങള്‍ കൊണ്ടുവരും. നൃത്ത, സംഗീത മത്സര ഇനങ്ങള്‍ക്ക് വൈവ ഏര്‍പ്പെടുത്താനും അപ്പീല്‍ പ്രളയം ഒഴിവാക്കാനുമുള്ള നിര്‍ദ്ദേശങ്ങളും സമിതി മുന്നോട്ടുവെച്ചിട്ടുണ്ട്.