ന്യൂഡല്‍ഹി: മനുഷ്യ ശരീരം മുഴുവനായും കാണാന്‍ പറ്റുന്ന ക്യാമറ ഒരു കൂട്ടം ശാസ്ത്രജ്ഞര്‍ വികസിപ്പിച്ചെടുത്തു. മനുഷ്യ ശരീരത്തിന്റെ അകത്തുള്ളത് പുറമേ നിന്നും വ്യക്തമായി കാണാന്‍ കഴിയുന്ന ക്യാമറ ഡോക്ടര്‍മാരെ ഉദ്ദേശിച്ചാണ് പ്രധാനമായും പുറത്തിറക്കുന്നത്.

ഡോക്ടര്‍മാര്‍ക്ക് വിവിധ അസുഖങ്ങള്‍ കണ്ടെത്താനും പരിശോധന നടത്താനും ഇത് സഹായകമാവും. ആന്തരികമായ പരിശോധനകള്‍ക്കും എന്‍ഡോസ്‌കോപി പോലുള്ള പരിശോധനകള്‍ക്കും ക്യാമറ സഹായകരമാവും. നീളമുള്ള ട്യൂബ് വഴി ക്യാമറ ശരീരത്തിനകത്തേക്കും പ്രവേശിപ്പിക്കാന്‍ സാധിക്കും.

ഇതില്‍ ഘടിപ്പിച്ച വെളിച്ചം മുഖേന ശരീരത്തിനകത്തുള്ളതെല്ലാം വ്യക്തമായി പുറത്ത് സ്‌ക്രീനില്‍ കാണാന്‍ സാധിക്കും. നിലവില്‍ എക്‌സ്‌റേ സംവിധാനം വഴി മാത്രമേ ശരീരത്തിനുള്ളിലുള്ളത് പുറത്ത് കാണാന്‍ സാധിക്കൂ. ഈ ക്യാമറ പ്രവര്‍ത്തന സജ്ജമാകുന്നതോടെ എക്‌സറേയുടെ സഹായമില്ലാതെ ശരീരത്തിനകത്തുള്ളത് പുറത്തേക്ക് കാണാന്‍ സാധിക്കും. എഡിന്‍ബര്‍ഗിലേയും ഹെരിയോറ്റ് വാട് സര്‍വകലാശാലയിലേയും ഗവേഷകരാണ് പുതിയ കണ്ടുപിടിത്തത്തിന് പിന്നില്‍.