റിയാദ്: ഒരു വ്യാഴവട്ട കാലത്തിനു ശേഷം സഊദി അറേബ്യ ലോകക്കപ്പ് ഫുട്‌ബോളിന്റെ യോഗ്യത ഫൈനല്‍ റൗണ്ടിലെത്തി. ഏഷ്യന്‍ യോഗ്യതാ റൗണ്ടിലെ അവസാന മത്സരത്തില്‍ ജപ്പാനെ ഒരു ഗോളിന് തോല്‍പ്പിച്ചാണ് ഫൈനലില്‍ എത്തിച്ചേര്‍ന്നത്.

ഗ്രൂപ്പ് ബിയില്‍ നിന്നും ജപ്പാന്‍ നേരത്തെ യോഗ്യത നേടിയിരുന്നു. സഊദിയുടെ ഫഹദ് അല്‍ മുവല്ലതാണ് രാജ്യത്തിന്റെ സ്വപ്‌നം പൂവണിക്കാന്‍ മിന്നും ജയം നേടിക്കൊടുത്തത്. സഊദി സമയം ചൊവ്വാഴ്ച ഉച്ചയോടെ നടന്ന മത്സരത്തില്‍ ഓസ്‌ട്രേലിയക്ക് തായ്‌ലന്‍ഡിലെ 21 നെ തോല്‍പ്പിക്കാനേ സാധിച്ചിരുന്നുള്ളൂ. അതോടെ രാത്രി നടന്ന മത്സരത്തില്‍ ജപ്പാനെതിരെ ഒരു ഗോളിലെങ്കിലും വിജയിച്ചതിനെ തുടര്‍ന്നാണ് സഊദിക്ക് ഫൈനല്‍ റൗണ്ടില്‍ എത്താനായത്. കൊടും ചൂടില്‍ നടന്ന കളിയില്‍ ആദ്യ പകുതിയില്‍ ജപ്പാന്‍ പ്രതിരോധം ശക്തമായിരുന്നെങ്കിലും അറുപത്തി മൂന്നാം മിനുറ്റില്‍ പിറന്ന ഗോള്‍ സഊദിയുടെ ലക്ഷ്യം പൂര്‍ത്തീകരിക്കുകയായിരുന്നു.

ഫുട്‌ബോള്‍ പ്രേമികളായ സഊദിയുടെ ഈ നേട്ടം രാജ്യം ആവേശപൂര്‍വ്വമാണ് കൊണ്ടാടുന്നത്. സഊദി ടീമിനും ഗോളടിച്ച താരത്തിനും രാജകീയ പരിവേഷമാണ് രാജ്യം നല്‍കുന്നത്. ജിദ്ദയിലെ ജൗഹറ സ്‌റ്റേഡിയത്തില്‍ കളി കാണാനായി എഴുപത്തിനായിരത്തോളം ആളുകളാണ് എത്തിച്ചേര്‍ന്നിരുന്നത്. കാണികള്‍ക്കും കളിക്കാര്‍ക്കും ആവേശമായി സഊദി യുവതയുടെ ആവേശം കിരീടാവകാശി മുഹമ്മദ് ബിന്‍ സല്‍മാന്‍ രാജകുമാരനും കളി കാണാനെത്തിയിരുന്നു.