തിരുവനന്തപുരം: ഓണത്തിനു വന്‍ലാഭം കൊയ്ത് സര്‍ക്കാരിന്റെ ഓണച്ചന്തകള്‍. സപ്ലൈകോ, കണ്‍സ്യൂമര്‍ ഫെഡ് എന്നിവയാണ് മുന്‍ വര്‍ഷങ്ങളിലേക്കാള്‍ കൂടുതല്‍ ലാഭം കൊയ്തത്.
കേരളത്തില്‍ ജൈവപച്ചക്കറിയുടെ ഉപയോഗവും കുറഞ്ഞവിലയ്ക്കു സാധനങ്ങള്‍ നല്‍കിയതും സര്‍ക്കാരിന്റെ വിപണിയിലെ ഇടപെടലുകളുമാണ് ഓണച്ചന്തകളില്‍ മുന്‍വര്‍ഷങ്ങളെ അപേക്ഷിച്ച് വന്‍ വിറ്റുവരവ് ഉണ്ടായത്.
പത്തുദിവസം കൊണ്ട് ഓണക്കച്ചവടം നടത്തിയ സപ്ലൈകോ വിറ്റഴിച്ചത് നൂറു കോടിയോളം രൂപയുടെ സാധനങ്ങളാണ്. ഏറ്റവും കൂടുതല്‍ ഓണച്ചന്തകള്‍ തുറന്ന കണ്‍സ്യൂമര്‍ ഫെഡ് 192 കോടി വിറ്റുവരവുണ്ടാക്കിയപ്പോള്‍ പച്ചക്കറിവില പിടിച്ചുനിര്‍ത്താന്‍ ഹോര്‍ട്ടികോര്‍പ്പിനുമായി. സപ്ലൈകോയുടെ 187 ഓണച്ചന്തകളില്‍ മാത്രം 30 കോടി രൂപയാണ് വിറ്റുവരവ്. 1,289 സ്ഥിരവില്‍പന കേന്ദ്രങ്ങളില്‍ അവസാനത്തെ പത്തുദിവസം വിറ്റഴിച്ചത് 70 കോടിയുടെ സാധനങ്ങളാണ്. കഴിഞ്ഞതവണത്തേക്കാള്‍ 25 കോടി രൂപയുടെ വര്‍ധനവാണുണ്ടായത്.
ആന്ധ്രയില്‍ നിന്ന് അരി നേരിട്ടെത്തിച്ചതും ഓണച്ചന്തകളുടെ കൃത്യമായ നടത്തിപ്പിനായി കണ്‍ട്രോള്‍ റൂമുകള്‍ തുറന്നതുമാണ് സപ്ലൈകോയ്ക്ക് നേട്ടമായത്.
അഴിമതിയില്‍നിന്ന് കരകയറിയ കണ്‍സ്യൂമര്‍ ഫെഡിനും മികച്ച വരുമാനമുണ്ടാക്കാനായി. കഴിഞ്ഞതവണ 1,030 ഓണച്ചന്തകളുടെ സ്ഥാനത്ത് ഇക്കുറി 3,477 എണ്ണം തുറന്നപ്പോള്‍ വിറ്റുകിട്ടിയത് 192 കോടി രൂപയാണ്. ഇത് കഴിഞ്ഞവര്‍ഷത്തേക്കാള്‍ 104 കോടി രൂപ അധികംവരും. കാന്തല്ലൂരില്‍ നിന്നും വട്ടവടയില്‍ നിന്നും 485 മെട്രിക് ടണ്‍ പച്ചക്കറിയെടുത്ത ഹോര്‍ട്ടികോര്‍പ്പിനും ഇത്തവണ പിഴച്ചില്ല. 11.6 കോടിയാണ് വിറ്റുവരവ്.
ബലിപെരുന്നാളും ഓണവും ഒന്നിച്ചുവന്നതും സര്‍ക്കാര്‍ സ്ഥാപനങ്ങള്‍ക്ക് തുണയായി. ഉത്സവ സീസണ്‍ മുന്‍കൂട്ടിക്കണ്ട് കണ്‍സ്യൂമര്‍ ഫെഡിനും സപ്ലൈകോയ്ക്കും നല്ല സാധനങ്ങള്‍ ഷോപ്പുകളിലെത്തിക്കാന്‍ കഴിഞ്ഞു.
മില്‍മയും മികച്ച പ്രകടനമാണ് കാഴ്ചവച്ചത്. പാലിന്റെ ആഭ്യന്തര ഉല്‍പാദനം കൂടിയതിനാല്‍ മില്‍മ ഇത്തവണ ഇതരസംസ്ഥാനങ്ങളില്‍ നിന്ന് കുറച്ചു പാല്‍ മാത്രമേ ശേഖരിച്ചിരുന്നുള്ളൂ. അതിര്‍ത്തിയില്‍ പരിശോധന കര്‍ശനമാക്കിയതിനെ തുടര്‍ന്ന് ഇതരസംസ്ഥാനങ്ങളില്‍ നിന്ന് പാല്‍ കൊണ്ടുവരുന്നത് കുറഞ്ഞതും മില്‍മയ്ക്ക് തുണയായി.