ഫ്‌ളോറിഡ: ഇര്‍മ ചുഴലിക്കാറ്റ് നാശംവിതച്ച ഫ്‌ളോറിഡയിലെ നഴ്‌സിങ് ഹോമില്‍ വൈദ്യുതി ബന്ധം നിലച്ചതിനെ തുടര്‍ന്ന് അഞ്ചു മരണം. മൂന്നു ദിവസമായി ഇവിടെ വൈദ്യുതി ഇല്ലാത്തത് ആശുപത്രി പ്രവര്‍ത്തനങ്ങളെ ബാധിച്ചിരുന്നു.
ഇതാണ് രോഗികള്‍ മരിക്കാനിടയാക്കിയത്. ഇതില്‍ മൂന്നു പേരുടെ മൃതദേഹം ആശുപത്രിയില്‍ നിന്നും രണ്ടുപേരുടേത് ആശുപത്രി പരിസരത്തുനിന്നുമാണ് ലഭിച്ചത്. ഇവര്‍ ആശുപത്രിയിലെത്തും മുന്‍പ് മരിച്ചതായി പൊലിസ് വ്യക്തമാക്കി.
അതേസമയം മേഖലയില്‍ നിന്ന് 115 വീടുകള്‍ ഒഴിപ്പിച്ചതായി ബ്രൊവാര്‍ഡ് കൗണ്ടി മേയര്‍ ബാര്‍ബറ ഷെരീഫ് പറഞ്ഞു. ഫ്‌ളോറിഡയില്‍ ഒരുകോടിയിലധികം പേരെ വൈദ്യുതിയുടെ അഭാവത്തെ തുടര്‍ന്ന് ഒഴിപ്പിച്ചതായി പൊലിസ് പറഞ്ഞു. നഴ്‌സിങ് ഹോമില്‍ രോഗികള്‍ മരിച്ച സംഭവത്തില്‍ പൊലിസ് അന്വേഷണം പ്രഖ്യാപിച്ചിട്ടുണ്ട്.
നഗരത്തിലെ ജനവാസ കേന്ദ്രങ്ങളിലും ആശുപത്രികളിലും തിരച്ചില്‍ നടത്തുന്നുണ്ട്.