ദുബൈ: പത്തുവയസുകാരനെ പിതാവ് ക്രൂരമായി മര്‍ദിച്ച സംഭവത്തില്‍ നടപടി സ്വീകരിച്ച് ദുബൈ പൊലിസ്. പത്തുവയസുകാരനായ കുട്ടി, പിതാവിന്റെ ക്രൂരമായ മര്‍ദനത്തെക്കുറിച്ച് ദുബൈ പൊലിസിന്റെ സ്മാര്‍ട്ട് ആപ്പ് വഴി പരാതി നല്‍കുകയായിരുന്നു. മര്‍ദനത്തിന്റെ ഫലമായി കുട്ടിയുടെ ശരീരത്തില്‍ ചതവുകളും പാടുകളും ഉണ്ടായിരുന്നു. സ്‌കൂളിലെ കൂട്ടുകാര്‍ പരുക്കുകള്‍ ശ്രദ്ധിക്കാതിരിക്കാന്‍ കുട്ടി ശ്രമിച്ചിരുന്നു.

ALSO READ: 'ഫ്‌ലാറ്റുകളില്‍ താമസിക്കുന്നത് 35 പേര്‍'; ദുബൈയില്‍ അനധികൃത മുറി പങ്കിടലിനെ തുടര്‍ന്ന് നിരവധി കുടുംബങ്ങള്‍ ബുദ്ധിമുട്ടിലെന്ന് റിപ്പോര്‍ട്ട്

'കുട്ടിയുടെ പിതാവ് വളരെ കഠിനമായാണ് കുട്ടിയോട് പെരുമാറിയത്, എന്തിന്റെ പേരിലാണ് തന്നെ മര്‍ദിക്കുന്നതെന്ന് കുട്ടിക്ക് അറിയില്ലായിരുന്നു,' ചൈല്‍ഡ് ആന്‍ഡ് വുമണ്‍ പ്രൊട്ടക്ഷന്‍ ഡിപ്പാര്‍ട്ട്‌മെന്റ് ഡയറക്ടര്‍ ലെഫ്റ്റനന്റ് കേണല്‍ ഡോ. അലി അല്‍ മട്രൗഷി വ്യക്തമാക്കി.

സ്‌കൂളിന്റെ ഇടപെടല്‍

കുട്ടിയുടെ ശരീരത്തിലെ പാടുകളും പഠനത്തിലെ പിന്നാക്കംപോക്കും സ്‌കൂള്‍ മാനേജ്‌മെന്റ് ശ്രദ്ധിച്ചിരുന്നു. സ്‌കൂളിലെ സാമൂഹിക പ്രവര്‍ത്തകന്‍ കുട്ടിയുമായി സംസാരിച്ച ശേഷം, ദുബൈ പൊലിസിന്റെ സഹായം തേടാന്‍ ആവശ്യപ്പെടുകയായിരുന്നു. 

'ശിക്ഷിക്കപ്പെടുമെന്ന ഭയം മൂലം കുട്ടി ആദ്യം പരാതിപ്പെടാന്‍ മടിച്ചു. എന്നാല്‍, സാമൂഹിക പ്രവര്‍ത്തകന്റെ പിന്തുണയോടെ അവന്‍ പരാതി നല്‍കി,' അല്‍ മട്രൗഷി പറഞ്ഞു.

പിതാവിന്റെ പ്രതികരണവും നടപടികളും

പിതാവിനെ വിളിച്ചുവരുത്തി ചോദ്യം ചെയ്തപ്പോള്‍, മകനെ പീഡിപ്പിക്കാന്‍ ഉദ്ദേശിച്ചിരുന്നില്ലെന്ന് അദ്ദേഹം വ്യക്തമാക്കി. 

'മൂത്ത മകനെ ശക്തനാക്കാന്‍ താന്‍ വളര്‍ന്ന അത രീതി ഉപയോഗിച്ചതാണ്,' അദ്ദേഹം പറഞ്ഞു. എന്നാല്‍, അമിതമായ മര്‍ദനവും ക്രൂരമായ പെരുമാറ്റവും കുട്ടിയുടെ ശരീരത്തില്‍ പാടുകള്‍ ഉണ്ടാക്കുകയും പഠന നിലവാരം കുറയ്ക്കുകയും സമപ്രായക്കാരില്‍ നിന്ന് ഒറ്റപ്പെടുത്തുകയും ചെയ്തു.

ശിശുവനിതാ സംരക്ഷണ വകുപ്പ് കുട്ടിയുടെ പിതാവുമായി ചര്‍ച്ച നടത്തിയിട്ടുണ്ട്. പെരുമാറ്റത്തില്‍ മാറ്റം വരുത്തുമെന്ന് അദ്ദേഹം പറഞ്ഞതായാണ് വിവരം. 

'ഇത്തരം രക്ഷാകര്‍തൃത്വ രീതി പൂര്‍ണമായും തെറ്റാണ്, നിയമപ്രകാരം ശിക്ഷാര്‍ഹമാണ്,' അല്‍ മട്രൗഷി ഊന്നിപ്പറഞ്ഞു.

പിന്തുണയും പുനരധിവാസവും

ദുബൈ പൊലിസ് കുട്ടിയുമായി നിരന്തരം ആശയവിനിമയം നടത്തുമെന്നും, പങ്കാളികളുമായി സഹകരിച്ച് സാമൂഹികമാനസിക പുനരധിവാസവും കൗണ്‍സിലിംഗും നല്‍കുമെന്നും അല്‍ മട്രൗഷി അറിയിച്ചു. ഉചിതമായ നിയമനടപടികളും വകുപ്പ് സ്വീകരിക്കുന്നുണ്ട്.

ALSO READ: അജ്മാനിന്റെ ആകാശത്തും ഇനി പറക്കും ടാക്സികളോ? സ്കൈപോർട്ട്സ് ഇൻഫ്രാസ്ട്രക്ചറുമായി കരാർ ഒപ്പിട്ടു

റിപ്പോര്‍ട്ട് ചെയ്യാനുള്ള സംവിധാനങ്ങള്‍

കുട്ടികള്‍ക്കെതിരായ അക്രമങ്ങളോ ദുരുപയോഗങ്ങളോ ഉടന്‍ റിപ്പോര്‍ട്ട് ചെയ്യേണ്ടതിന്റെ പ്രാധാന്യം ദുബൈ പൊലിസ് ജനറല്‍ കമാന്‍ഡ് പൊതുജനങ്ങളെ ഓര്‍മിപ്പിച്ചു. പരാതികള്‍ രഹസ്യമായി റിപ്പോര്‍ട്ട് ചെയ്യാന്‍ ദുബൈ പൊലിസിന്റെ സ്മാര്‍ട്ട് ആപ്ലിക്കേഷന്‍, ഔദ്യോഗിക വെബ്‌സൈറ്റ്, 901 എന്ന ഹെല്‍പ്പ്‌ലൈന്‍ നമ്പര്‍ എന്നിവ ലഭ്യമാണ്. അല്ലെങ്കില്‍, അല്‍ ത്വാര്‍ പ്രദേശത്തെ ജനറല്‍ കമാന്‍ഡ് ആസ്ഥാനത്തുള്ള ചില്‍ഡ്രന്‍സ് ഒയാസിസ് നേരിട്ട് സന്ദര്‍ശിക്കാം.

Dubai Police have launched an investigation after receiving a complaint about a 10-year-old boy who was severely beaten by his father. The case has raised concerns about child abuse and the need for stronger protection measures.