മുക്കം: യുവാവിനെ അര്‍ധരാത്രി വീട്ടില്‍ നിന്ന് വിളിച്ചിറക്കി വെട്ടിയതിന് ശേഷം കിണറ്റില്‍ തള്ളി. മുക്കത്തിനടുത്ത് കൊടിയത്തൂര്‍ പഞ്ചായത്തിലെ പന്നിക്കോട് കാരാളിപറമ്പ് പാറപ്പുറത്ത് രമേശി(42) നെയാണ് വെട്ടിപ്പരുക്കേല്‍പ്പിച്ചത്. ബുധനാഴ്ച രാത്രി ഒരു മണിക്ക് ശേഷമാണ് സംഭവം. വീട്ടിലേക്ക് ഫോണ്‍ ചെയ്ത് വിളിച്ചിറക്കിയ ശേഷം കൃത്യം നടത്തുകയായിരുന്നു. ഗുരുതരമായി പരുക്കേറ്റ രമേശിനെ കോഴിക്കോട് മെഡിക്കല്‍ കോളജില്‍ പ്രവേശിപ്പിച്ച് അടിയന്തര ശസ്ത്രക്രിയക്ക് വിധേയനാക്കി. 6 മണിക്കൂറിലധികം സമയമെടുത്താണ് ശസ്ത്രക്രിയ പൂര്‍ത്തിയാക്കിയത്. ശസ്ത്രക്രിയക്ക് ശേഷം തീവ്രപരിചരണ വിഭാഗത്തിലേക്ക് മാറ്റി. കാരാളിപറമ്പ് അങ്ങാടിയില്‍ സംഭവം നടന്നതായി കരുതുന്ന സ്ഥലത്ത് രക്തം കട്ടപിടിച്ച് കിടക്കുന്നുണ്ട്. അങ്ങാടിയില്‍ നിന്ന് 50 മീറ്റര്‍ അകലെയാണ് രമേശിന്റെ വീട്. സ്ഥലത്ത് മുളക് പൊടി വിതറിയതായും കാണുന്നുണ്ട്. സംഭവസ്ഥലത്ത് നിന്ന് കണ്ടെത്തിയ കത്തി പൊലിസ് കസ്റ്റഡിയിലെടുത്തു.
ഇന്നലെ രാവിലെ 7 മണിയോടെയാണ് സംഭവം നാട്ടുകാരറിയുന്നത്. അങ്ങാടിക്ക് സമീപത്തെ കിണറ്റില്‍ നിന്ന് ശബ്ദം കേട്ട് തിരച്ചില്‍ നടത്തിയപ്പോഴാണ് അവശനിലയിലായ രമേശിനെ കണ്ടത്. ഉടന്‍ തന്നെ മുക്കം പൊലിസില്‍ വിവരമറിയിക്കുകയായിരുന്നു. മുക്കം ഫയര്‍ഫോഴ്‌സ് സ്ഥലത്തെത്തിയാണ് ഇയാളെ കിണറില്‍ നിന്ന് പുറത്തെടുത്ത് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചത്. ഫയര്‍മാന്‍ ഫസല്‍ അലിയാണ് ഗുരുതരാവസ്ഥയില്‍ കിണറ്റില്‍ കിടന്ന രമേശിനെ കരക്കെത്തിച്ചത്. വിരലടയാള വിദഗ്ധരും ഡോഗ് സ്‌ക്വാഡും താമരശ്ശേരി സി.ഐ. അഗസ്റ്റിന്റെ നേതൃത്വത്തില്‍ പൊലിസും സ്ഥലത്തെത്തി. സാമ്പത്തിക ഇടപാടുമായി ബന്ധപ്പെട്ട കാര്യങ്ങളാണ് സംഭവത്തിന് പിന്നിലെന്നാണ് സംശയം.