ശാസ്താംകോട്ട: ലഹരി വസ്തു ചവച്ചത് അധ്യാപകര്‍ കണ്ടെത്തിയതിനെ തുടര്‍ന്ന് സ്‌കൂളില്‍ നിന്നും രക്ഷപ്പെട്ട്   കാട്ടിലൊളിച്ച വിദ്യാര്‍ഥികളെ മണിക്കൂറുകള്‍ക്ക് ശേഷം സ്‌കൂള്‍ അധികൃതരും നാട്ടുകാരും ചേര്‍ന്നു കണ്ടെത്തി  രക്ഷകര്‍ത്താക്കളെ ഏല്‍പിച്ചു.
ഇന്നലെ ഉച്ചക്ക് ശാസ്താംകോട്ട തടാക തീരത്തെ സ്വകാര്യ സ്‌കൂളിലെ വിദ്യാര്‍ഥികളെയാണ്മണിക്കൂറുകളോളം നടത്തിയ അന്വേഷണത്തിനൊടുവില്‍ കണ്ടെത്തിയത്.  രാവിലെ 11ന് ക്ലാസ് നടക്കുന്നതിനിടയില്‍ കുട്ടികള്‍ എന്തോ വായിലിട്ട് ചവക്കുന്നത് അധ്യാപികയുടെ ശ്രദ്ധയില്‍പെട്ടു. കുട്ടികളെ വിളിച്ച് ചോദ്യം ചെയ്തതില്‍ ലഹരിവസ്തുവാണെന്ന്  ബോധ്യപ്പെടുകയും തുടര്‍ന്ന് രക്ഷകര്‍ത്താക്കളെ വിവരമറിയിക്കുകയും കുട്ടികളെ ഒരുമണിക്കൂറോളം ക്ലാസിന് പുറത്തു നിര്‍ത്തുകയും ചെയ്തു.
ഭക്ഷണ സമയം കഴിഞ്ഞപ്പോഴാണ് കുട്ടികളെ കാണാതായത്. തുടര്‍ന്ന് കുട്ടികളും സ്‌കൂള്‍ അധികൃതരും ചേര്‍ന്ന അന്വേഷണം നടത്തിയെങ്കിലും കണ്ടെത്താനായില്ല.
വിവരമറിഞ്ഞ് നാട്ടുകാരുമെത്തി. തുടര്‍ന്ന്  മൂന്ന്
മണിക്കൂറുകള്‍ക്ക് ശേഷം തടാക തീരത്തെ കാട്ടില്‍
കുട്ടികള്‍ ഒളിച്ച് നില്‍ക്കുന്ന വിവരം സ്‌കൂള്‍ അധികൃതരെ
പരിസരവാസികള്‍ അറിയിക്കുകയും കാട്ടില്‍ നിന്ന് കുട്ടികളെ
പുറത്തെത്തിച്ച് രക്ഷകര്‍ത്താക്കളെ വരുത്തി ഏല്‍പ്പിക്കുകയുമായിരുന്നു.