ഏറ്റുമാനൂര്‍: അതിരമ്പുഴ സെന്റ് അലോഷ്യസ് സ്‌കൂളില്‍ നിയമസഭാ തെരഞ്ഞെടുപ്പ് മാതൃകയില്‍ നടത്തിയ  സ്‌കൂള്‍ പാര്‍ലമെന്റ് ഇലക്ഷന്‍ വിദ്യാര്‍ഥികള്‍ക്കു വേറിട്ട അനുഭവമായി.
സ്‌കൂള്‍ ലീഡര്‍, ക്ലാസ് പ്രതിനിധി എന്നീ വിഭാഗങ്ങളിലേക്കു നടന്ന പോളീങില്‍ അഞ്ചുമുതല്‍ 10 വരെ ക്ലാസുകളിലെ 965 വിദ്യാര്‍ഥികള്‍ വോട്ട് രേഖപ്പെടുത്തി. സമ്മതിദാനാവകാശത്തിന്റെ പ്രാധാന്യവും മറ്റും കുട്ടികളെ മനസിലാക്കുക എന്ന ഉദ്ദേശ്യത്തോടു കൂടിയായിരുന്നു വിദ്യാര്‍ഥിനേതാക്കളുടെ തെരഞ്ഞെടുപ്പ് ഈ രൂപത്തില്‍ ചെയ്തത്.
സ്‌കൂള്‍ ഇന്‍ഡോര്‍ സ്റ്റേഡിയത്തില്‍ ആറ് പോളിങ് സ്റ്റേഷനുകള്‍ ക്രമീകരിച്ചിരുന്നു. പ്രിസൈഡിങ് ഓഫിസര്‍, പോളിങ് ഓഫിസര്‍ എന്നിവരുടെ ചുമതലകള്‍ അധ്യാപകര്‍ നിര്‍വഹിച്ചു. ക്രമസമാധാന പാലകരുടെ റോളില്‍ എന്‍.സി.സി, സ്‌കൗട്ട് അംഗങ്ങള്‍ തെരഞ്ഞെടുപ്പ് ക്രമീകരണങ്ങള്‍ക്ക് നേതൃത്വം നല്‍കി. ഹെഡ്മാസ്റ്റര്‍ ഇ.കെ ജോഷി, അധ്യാപകരായ എം.എഫ് തോമസ്, ബോബി ജയിംസ്, ബിനു ജോണ്‍, കെ.ജെ തങ്കച്ചന്‍, സജിത് കുമാര്‍, സുജ ജോസ്, റജിമോന്‍ ജോസഫ്, സി ജോളി ജോസഫ്, ജോഷി ഇലഞ്ഞിയില്‍ എന്നിവര്‍ നേതൃത്വം വഹിച്ചു.