സിയൂള്‍: ഒളിംപിക്, ലോക ചാംപ്യന്‍ഷിപ്പ് വെള്ളി മെഡല്‍ ജേത്രി ഇന്ത്യയുടെ പി.വി സിന്ധു കൊറിയ ഓപണ്‍ സൂപ്പര്‍ സീരീസ് ബാഡ്മിന്റണിന്റെ സെമിയില്‍. ക്വാര്‍ട്ടറില്‍ ലോക 19ാം റങ്കുകാരി ജപ്പാന്റെ മിനറ്റ്‌സു മിതാനിയെ പരാജയപ്പെടുത്തിയാണ് സിന്ധു അവസാന നാലിലെത്തിയത്. ഒരു മണിക്കൂറും മൂന്ന് മിനുട്ടും നീണ്ട പോരാട്ടത്തില്‍ 21-19, 16-21, 21-10 എന്ന സ്‌കോറിനാണ് സിന്ധുവിന്റെ വിജയം.
കടുത്ത വെല്ലുവിളിയാണ് ജപ്പാന്‍ താരം സിന്ധുവിനെതിരേ ഉയര്‍ത്തിയത്. ആദ്യ സെറ്റില്‍ 6-2 ലീഡുമായി കുതിച്ച സിന്ധുവിനെ 11-9 എന്ന നിലയിലും പിന്നിട് 16-16 എന്ന നിലയിലും പിടിക്കാന്‍ മിതാനിക്ക് സാധിച്ചു. എന്നാല്‍ പിന്നീട് മികച്ച പോരാട്ടം പുറത്തെടുത്ത ഇന്ത്യന്‍ താരം 19-16, 21-19 എന്ന നിലകളില്‍ പോയിന്റെടുത്ത് സെറ്റ് സ്വന്തമാക്കി. രണ്ടാം സെറ്റിന്റെ തുടക്കം മുതല്‍ മിതാനിയുടെ മുന്നേറ്റമായിരുന്നു. 13-13 എന്ന നിലയില്‍ പോയിന്റ് തുല്ല്യതയിലെത്തിക്കാന്‍ സിന്ധുവിന് സാധിച്ചെങ്കിലും മിതാനി സെറ്റ് പിടിച്ചെടുത്ത് മത്സരത്തിലേക്ക് തിരിച്ചെത്തി. മൂന്നാം സെറ്റില്‍ ആധികാരിക മുന്നേറ്റമാണ് സിന്ധു നടത്തിയത്.
എതിരാളിക്ക് കാര്യമായ പഴുത് അനുവദിക്കാതെയായിരുന്നു കുതിപ്പ്. 19-9 എന്ന സ്‌കോറില്‍ ഇടവേളയ്ക്ക് പിരിഞ്ഞ് തിരിച്ചെത്തിയ സിന്ധു ഒറ്റ പോയിന്റ് മാത്രം വിട്ടുകൊടുത്ത് സെറ്റും വിജയവും 21-10 എന്ന സ്‌കോറിന് ഉറപ്പാക്കി. സെമിയില്‍ ആറാം സീഡ് ചൈനയുടെ ഹി ബിങ്ജിയാവോയാണ് സിന്ധുവിന്റെ എതിരാളി.
പുരുഷ സിംഗിള്‍സില്‍ ക്വാര്‍ട്ടറിലെത്തി പ്രതീക്ഷ നല്‍കിയ സമീര്‍ വര്‍മ തോല്‍വിയോടെ പുറത്തായി. കൊറിയന്‍ താരം സന്‍ വാനാണ് സമീറിനെ പരാജയപ്പെടുത്തിയത്. ആദ്യ സെറ്റില്‍ വിജയിച്ച ശേഷമാണ് സമീര്‍ തോല്‍വി വഴങ്ങിയത്. സ്‌കോര്‍: 20-22, 21-10, 21-13.