വെട്ടത്തൂര്‍: കനത്ത മഴയില്‍ പെരിന്തല്‍മണ്ണ മാനത്തുമംഗലം മണ്ണാര്‍മല മാട് റോഡ് ബൈപാസില്‍ മണ്ണിടിയുന്നത് വാഹനയാത്രക്കാര്‍ക്ക് അപകടഭീഷണി ഉയര്‍ത്തുന്നു. റോഡിന്റെ വശങ്ങള്‍ വിണ്ടുകീറി രണ്ടിടത്ത് ഇന്നലെയും മണ്ണിടിഞ്ഞു. കൂടാതെ തെങ്ങുകളും മറ്റു മരങ്ങളും റോഡിലേക്ക് വീഴാന്‍ പാകത്തില്‍ നില്‍ക്കുന്നുമുണ്ട്. ഇതോടെ നിരവധി വാഹനങ്ങള്‍ സദാസമയം കടന്നുപോകുന്ന പാതയിലൂടെ ജീവന്‍ പണയംവച്ചാണ് ആളുകള്‍ യാത്രചെയ്യുന്നത്. ഇന്നലെ മഴ കനത്തതോടെയാണ് മണ്ണിടിച്ചില്‍ ഉണ്ടായത്. ഇതേതുടര്‍ന്ന് റൂട്ടില്‍ ഭാഗികമായി ഗതാഗതവും തടസപ്പെട്ടു. കഴിഞ്ഞ വര്‍ഷക്കാലങ്ങളില്‍ പ്രദേശത്ത് മണ്ണിടിച്ചില്‍ ഉണ്ടായതിനെ തുടര്‍ന്ന് പൊതുമരാമത്ത് വകുപ്പ് ഒരാഴ്ച ഈ വഴി ഗതാഗതം നിരോധിച്ചിരുന്നു. വര്‍ഷങ്ങള്‍ക്ക് മുമ്പ് റോഡ് പുനരുദ്ധാരണത്തിന്റെ ഭാഗമായി മണ്ണെടുക്കുകയും റോഡ് താഴ്ത്തുകയും ചെയ്തതാണ് ഇവിടെ മണ്ണിടിച്ചിലിന് കാരണം.
പെരിന്തല്‍മണ്ണയിലേക്ക് പട്ടിക്കാട് ചുങ്കം വഴി സഞ്ചരിക്കുന്നതിനേക്കാള്‍ എളുപ്പത്തില്‍ എത്തിപ്പെടാനുള്ള വഴിമാര്‍ഗമായതിനാല്‍ ഈ റൂട്ടില്‍ ഗതാഗത തിരക്കും ഏറെയാണ്. അപകട സാധ്യത തരണം ചെയ്യാന്‍ റോഡിന്റെ ഇരുഭാഗങ്ങളിലും സംരക്ഷണഭിത്തി കെട്ടി സംരക്ഷിക്കണമെന്നാണ് യാത്രക്കാരുടെ ആവശ്യം.