പാപ്പിനിശ്ശേരി: വളപട്ടണം പാലത്തിന് സമീപം റോഡിന്റെ സംരക്ഷണ ഭിത്തിക്ക് മുകളില്‍ ഭീഷണിയായി നില്‍ക്കുന്ന വന്‍മരങ്ങള്‍ മുറിച്ചു മാറ്റാത്ത അധികൃതരുടെ നിലപാടിനെതിരേ പ്രതിഷേധം ശക്തമാവുന്നു. വര്‍ഷങ്ങള്‍ക്ക് മുന്‍പ് സംരക്ഷണ ഭിത്തിയായി കെട്ടിയുണ്ടാക്കിയ പാറക്കല്ലുകള്‍ക്ക് മുകളിലാണ് ഇവ വളര്‍ന്നുനില്‍ക്കുന്നത്. കാലപ്പഴക്കത്താല്‍ ഉറപ്പുകുറഞ്ഞ കല്ലുകള്‍ റോഡിലേക്ക് വീഴുന്നതും പതിവാണ്. ഇവക്ക് മുകളില്‍ നില്‍ക്കുന്ന മരങ്ങള്‍ ഉടനടി മുറിച്ചുമാറ്റണമെന്നാണ് ജനങ്ങളുടെ ആവശ്യം. മരങ്ങള്‍ക്ക് അടിഭാഗത്തായി വൈദ്യുത ലൈനുകളും കടന്ന് പോകുന്നുണ്ട്.
ഞായറാഴ്ച രാത്രി പെയ്ത ശക്തമായ കാറ്റിലും മഴയിലും വളപട്ടണം പാലത്തിനടുത്ത് ദേശീയ പാതയില്‍ റോഡിലേക്ക് കൂറ്റന്‍ പനമരം കടപുഴകി വീണിരുന്നു. അന്ന് തലനാരിഴക്കാണ് ഇവിടെയുള്ളവര്‍ രക്ഷപ്പെട്ടത്. പനമരം റോഡിലേക്ക് വീഴാതെ ഇരുവശത്തെയും സംരക്ഷണ ഭിത്തിക്ക് മുകളില്‍ തങ്ങി നില്‍ക്കുകയായിരുന്നു. ദേശീയ പാതയില്‍ മണിക്കൂറുകളോളം ഗതാഗതം സ്തംഭിക്കുകയും ചെയ്തു. തുടര്‍ന്ന് പൊലിസ്, ഫയര്‍ ഫോഴ്‌സ് , നാട്ടൂകാരും ചേര്‍ന്ന് ക്രെയിന്‍ ഉപയോഗിച്ചാണ് പനമരം നീക്കം ചെയ്തത്.
കഴിഞ്ഞ വര്‍ഷം ജുലൈയില്‍ പൊതുമരാമത്ത് വകുപ്പിന്റെ നേതൃത്വത്തില്‍ ദേശീയപാത വളപട്ടണം പാലത്തിന് സമീപം ഭീഷണിയുയര്‍ത്തി നില്‍ക്കുന്ന മരങ്ങള്‍ മുറിച്ചു മാറ്റുന്ന ജോലികള്‍ ആരംഭിച്ചിരുന്നു. തുടര്‍ന്ന് പാലത്തിന് മുകളില്‍ കെ.എസ്.ആര്‍.ടി.സി ബസ് തകരാറിലായി.
ഇതോടെ ഗതാഗത സ്തംഭനം ഉണ്ടാകുകയും മരം മുറിക്കുന്നത് നിര്‍ത്തിവയ്ക്കുകയുമായിരുന്നു. എന്നാല്‍ പിന്നീട് ഭീഷണി ഉയര്‍ത്തി നില്‍ക്കുന്ന മരങ്ങള്‍ മുറിച്ചു മാറ്റുന്നതിന് അധികൃതരുടെ ഭാഗത്ത് നിന്ന് നടപടിയുണ്ടായില്ല.