മാഡ്രിഡ്: 74 മത്സരങ്ങള്‍ക്കൊടുവില്‍ റയല്‍ മാഡ്രിഡ് തോല്‍വിയുടെ നിരാശ അറിഞ്ഞു. സൂപ്പര്‍ താരം ക്രിസ്റ്റ്യാനോ റൊണാള്‍ഡോ അഞ്ച് മത്സരങ്ങളിലെ വിലക്കിന് ശേഷം തിരിച്ചെത്തിയ സ്പാനിഷ് ലാ ലിഗ പോരാട്ടത്തില്‍ നിലവിലെ ചാംപ്യന്‍മാരായ റയല്‍ മാഡ്രിഡിനെ അവരുടെ തട്ടകമായ സാന്റിയാഗോ ബെര്‍ണാബുവില്‍ റയല്‍ ബെറ്റിസ് ഞെട്ടിക്കുന്ന തോല്‍വിയിലേക്ക് തള്ളിയിട്ടു. കളി തീരാന്‍ നിമിഷങ്ങള്‍ മാത്രമുള്ളപ്പോള്‍ അന്റോണിയോ സനാബ്രിയ നേടിയ ഗോളാണ് ബെറ്റിസിന് അപ്രതീക്ഷിത വിജയം സമ്മാനിച്ചത്. അവസാന നിമിഷം വരെ ഇരു പക്ഷവും ഗോള്‍ നേടുന്നതില്‍ പരാജയപ്പെട്ടപ്പോള്‍ മത്സരം ഗോള്‍രഹിത സമനിലയില്‍ അവസാനിക്കുമെന്ന് പ്രതീക്ഷിക്കപ്പെട്ടു. എന്നാല്‍ 94ാം മിനുട്ടിലെ ഗോള്‍ ബെറ്റിസിന് 1998ന് ശേഷം സാന്റിയാഗോ ബെര്‍ണാബുവില്‍ ഒരു വിജയം സമ്മാനിക്കുകയായിരുന്നു. അഞ്ച് മത്സരങ്ങള്‍ പൂര്‍ത്തിയായപ്പോള്‍ രണ്ട് വീതം വിജയവും സമനിലയും ഒരു തോല്‍വിയുമായി റയല്‍ മാഡ്രിഡ് എട്ട് പോയിന്റുമായി ഏഴാം സ്ഥാനത്ത്. 15 പോയിന്റുമായി ബാഴ്‌സലോണയാണ് ഒന്നാമത്.
മറ്റ് മത്സരങ്ങളില്‍ സെവിയ്യ, ഡിപോര്‍ടീവോ ലാ കൊരുണ ടീമുകള്‍ വിജയം സ്വന്തമാക്കി. സെവിയ്യ 1-0ത്തിന് ലാസ് പല്‍മാസിനേയും ഡിപോര്‍ടീവോ ഇതേ സ്‌കോറിന് ആല്‍വെസിനേയും വീഴ്ത്തി.

ബൊറൂസിയ
ഒന്നാം സ്ഥാനത്ത്
മ്യൂണിക്ക്: ജര്‍മന്‍ ബുണ്ടസ് ലീഗയില്‍ ബൊറൂസിയ ഡോര്‍ട്മുണ്ട് ഒന്നാം സ്ഥാനത്ത്. ഹാംബര്‍ഗറിനെ മറുപടിയില്ലാത്ത മൂന്ന് ഗോളുകള്‍ക്ക് വീഴ്ത്തിയാണ് അവര്‍ ബയേണിനെ പിന്തള്ളി ഒന്നാം സ്ഥാനം തിരിച്ചുപിടിച്ചത്. മറ്റ് മത്സരങ്ങളില്‍ ഹോഫെന്‍ഹെയിം 3-2ന് മെയ്ന്‍സിനേയും ഹെര്‍ത 2-1ന് ബയര്‍ ലെവര്‍കൂസനേയും പരാജയപ്പെടുത്തി. ഹന്നോവര്‍- ഫ്രീബര്‍ഗ് പോരാട്ടം 1-1ന് സമനില.

യുവന്റസിനെ
പിന്തള്ളി നാപോളി
മിലാന്‍: ഇറ്റാലിയന്‍ സീരി എയില്‍ യുവന്റസ്, നാപോളി, എ.സി മിലാന്‍, ടീമുകള്‍ക്ക് വിജയം. യുവന്റസ് 1-0ത്തിന് ഫിയോരെന്റിനേയേയും നാപോളി 4-1ന് ലാസിയോയേയും എ.സി മിലാന്‍ 2-0ത്തിന് എസ്.പി.എ.എല്ലിനേയും പരാജയപ്പെടുത്തി.
നാപോളിയും യുവന്റസും 15 വീതം പോയിന്റുമായും ഒന്നും രണ്ടും സ്ഥാനത്ത്. യുവന്റസിനെ ഗോള്‍ ശരാശരിയില്‍ പിന്തള്ളിയാണ് നാപോളി ഒന്നാം സ്ഥാനത്തേക്ക് കയറിയത്.