ന്യൂഡല്‍ഹി: താല്‍ക്കാലിക അഭിപ്രായ വ്യത്യാസങ്ങള്‍ മാറ്റിവച്ച് വലതുപക്ഷ ഫാസിസത്തിനെതിരേ ഒന്നിച്ച് ഡല്‍ഹി മുഖ്യമന്ത്രിയും അദ്ദേഹത്തിന്റെ എ.എ.പിയിലെ പഴയനേതാക്കളായ പ്രശാന്ത് ഭൂഷണും യോഗേന്ദ്രയാദവും.
വലതുപക്ഷ ഫാസിസത്തിനെതിരേ ഐക്യപ്പെടുകയെന്ന മുദ്രാവാക്യമുയര്‍ത്തിയാണ് ഇവര്‍ ഒരുമിക്കുന്നത്. ഫാസിസത്തിനെതിരേ പുതുതായി ഉയര്‍ന്നുവന്ന 'ജനാധിപത്യത്തെ രക്ഷിക്കാനുള്ള ജനാധിപത്യ മുന്നണി' എന്ന കൂട്ടായ്മയ്‌ക്കൊപ്പമാവും ഇവര്‍ അണിനിരക്കുക. എ.എ.പി നേതാക്കളും യോഗേന്ദ്രയാദവും ഭൂഷണും ഉള്‍പ്പെടുന്ന കൂട്ടായ്മയില്‍ സി.പി.ഐ (എം.എല്‍) റെഡ്സ്റ്റാര്‍ നേതാവ് കെ.എന്‍ രാമചന്ദ്രന്‍, ഗുജറാത്തിലെ ദലിത് നേതാവ് ജിഗ്നേഷ് മേവാനി, മുന്‍ ഐ.എ.എസ് ഉദ്യോഗസ്ഥനും സാമൂഹികപ്രവര്‍ത്തകനുമായ ഹര്‍ഷ് മന്ദിര്‍ തുടങ്ങിയവരുമുണ്ട്.
'ജനാധിപത്യത്തെ രക്ഷിക്കാനുള്ള ജനാധിപത്യ മുന്നണി' എന്ന പേരിലുള്ള കൂട്ടായ്മയുടെ ഔദ്യോഗിക പ്രഖ്യാപനം അടുത്തമാസം അഞ്ചിന് ഡല്‍ഹിയില്‍ നടക്കുന്ന റാലിയോടനുബന്ധിച്ച് ഉണ്ടാകും. പശുസംരക്ഷണത്തിന്റെ പേരിലുള്ള അക്രമങ്ങള്‍, ഗൗരിലങ്കേഷ് വധം തുടങ്ങിയവ ഉയര്‍ത്തിക്കാട്ടിയാണ് ഇവര്‍ അണിനിരക്കുന്നത്. അടുത്തമാസം അഞ്ചിന് ഉച്ചയ്ക്ക് ഒരുമണിക്ക് മണ്ഡിഹൗസില്‍ നിന്ന് ജന്തര്‍മന്ദിറിലേക്കാണ് പ്രകടനം. 2015ല്‍ പാര്‍ട്ടിയില്‍ നിന്നു പുറത്താക്കപ്പെട്ട ശേഷം ഇതാദ്യമായാണ് ഭൂഷണും യാദവും എ.എ.പി നേതാക്കള്‍ക്കൊപ്പം വേദിപങ്കിടുന്നത്.