പാലക്കാട്: സ്വാതന്ത്ര്യദിനത്തില്‍ വിടപറയുക വര്‍ഗീയതയോട്, അണിനിരക്കുക മതനിരപേക്ഷതയ്‌ക്കൊപ്പം മുദ്രാവാക്യവുമായി കാല്‍ലക്ഷം പേര്‍ അണിനിരക്കുന്ന യുവസാഗരം പരിപാടി പാലക്കാട് കോട്ടമൈതാനിയില്‍ നടത്തുമെന്ന് ഡി.വൈ.എഫ്.ഐ ജില്ലാ ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. വൈകിട്ട് നാലിന് പാലക്കാട് ഗവ. വിക്ടോറിയ കോളജ് പരിസരത്ത് നിന്നാരംഭിക്കുന്ന പ്രകടനം കോട്ടമൈതാനിയില്‍ സമാപിക്കും. തുടര്‍ന്ന് നടക്കുന്ന പൊതുസമ്മേളനം എ വിജയരാഘവന്‍ ഉദ്ഘാടനം ചെയ്യും. കെ.എസ് സുനില്‍ കുമാര്‍, സി.കെ രാജേന്ദ്രന്‍ പങ്കെടുക്കും.
യുവസാഗരത്തിന്റെ പ്രചരണാര്‍ഥം 14 ബ്ലോക്കുകളില്‍ കാല്‍നടപ്രചരണ ജാഥകളും അട്ടപ്പാടി ബ്ലോക്കില്‍ വാഹനപ്രചരണ ജാഥയും നടന്നു.
വാര്‍ത്താസമ്മേളനത്തില്‍ ഡി.വൈ.എഫ്.ഐ ജില്ലാ പ്രസിഡന്റ് നിതിന്‍ കണിച്ചേരി, ജില്ലാ സെക്രട്ടറി അഡ്വ. കെ. പ്രേംകുമാര്‍, ഖജാഞ്ചി ടി.എം ശശി, സംസ്ഥാന കമ്മിറ്റിയംഗം എം സുലോചന പങ്കെടുത്തു.