ജനീവ: ജനീവയിലെ ഐക്യരാഷ്ട്ര സഭ ആസ്ഥാനത്ത് നടത്തിയ ഫലസ്തീന്‍ ജനതയോടുള്ള ഐക്യദാര്‍ഢ്യ അന്താരാഷ്ട്ര ദിന പരിപാടിയില്‍ ഫലസ്തീനെ പിന്തുണച്ച് ഒമാന്‍. ഫലസ്തീന്‍ ജനതയുടെ അവകാശങ്ങള്‍ക്കും സ്വയംഭരണത്തിനും 1967 ജൂണ്‍ നാലിലെ അതിര്‍ത്തികളില്‍ കിഴക്കന്‍ ജറുസലേമിനെ തലസ്ഥാനമാക്കി സ്വതന്ത്ര രാജ്യം സ്ഥാപിക്കാനുള്ള അവകാശത്തിനും ഒമാന്‍ സുല്‍ത്താനേറ്റ് വീണ്ടും ശക്തമായ പിന്തുണ പ്രഖ്യാപിച്ചു.
1977ല്‍ ഐക്യരാഷ്ട്രസഭ ആചരിക്കാന്‍ തീരുമാനിച്ച ഈ ദിവസം, ഫലസ്തീന്‍ ജനതയുടെ ന്യായമായ അവകാശങ്ങള്‍ക്ക് ആഗോള സമൂഹത്തിന്റെ പ്രതിബദ്ധതയെയാണ് പ്രതിഫലിപ്പിക്കുന്നതെന്ന് ഐക്യരാഷ്ട്ര സഭയുടെ ഒമാന്‍ പ്രതിനിധി അംബാസഡര്‍ ഇദ്രീസ് അബ്ദുല്‍ റഹ്മാന്‍ അല്‍ഖന്‍ജാരി പറഞ്ഞു. 
അധിനിവേശവും നിയമവിരുദ്ധ നടപടികളും കാരണം ഫലസ്തീനികളുടെ കഷ്ടപ്പാടുകള്‍ ഇപ്പോഴും തുടരുകയാണ്. ഗതാഗത നിയന്ത്രണം, അനധികൃത കുടിയേറ്റക്കാരുടെ വ്യാപനം, നിര്‍ബന്ധിത പലായനം, വിശുദ്ധസ്ഥലങ്ങളിലെ ആക്രമണം എന്നിവ അന്താരാഷ്ട്ര നിയമത്തിന് നേരെയുള്ള തുറന്ന ലംഘനങ്ങളാണെന്നും ഇതില്‍ ഒമാന്‍ ആഴത്തിലുള്ള ആശങ്ക രേഖപ്പെടുത്തുന്നുവെന്നും അദ്ദേഹം പറഞ്ഞു.
പ്രസ്താവനകളില്‍ മാത്രം ഒതുങ്ങാതെ, നിയമപരവും മാനുഷികവുമായ ഉത്തരവാദിത്വങ്ങള്‍ നിറവേറ്റി, ലംഘനങ്ങള്‍ കുറയ്ക്കാനുള്ള ഉറച്ച നടപടികള്‍ സ്വീകരിക്കണമെന്ന് അല്‍ഖന്‍ജാരി അന്താരാഷ്ട്ര സമൂഹത്തോട് ആവശ്യപ്പെട്ടു. 
നടക്കാത്ത പ്രസ്താവനകളിലല്ല മറിച്ച് മനുഷ്യ മനഃസാക്ഷിക്ക് നിരക്കുന്ന യഥാര്‍ത്ഥ രാഷ്ട്രീയസന്നദ്ധതയാണ് ആവശ്യം. വളരെ ദീര്‍ഘകാലമായി നീണ്ടുനില്‍ക്കുന്ന ഈ ദുരിതത്തിന് അന്ത്യം കുറിക്കാന്‍ സമയം അതിക്രമിച്ചിരിക്കുന്നുവെന്ന് അദ്ദേഹം കൂട്ടിച്ചേര്‍ത്തു.

ALSO READ: അറബ് കപ്പിന് നാളെ തുടക്കം, ആദ്യ ദിവസം ഖത്തറും ഫലസ്തീനും ഏറ്റുമുട്ടും, വിറ്റ് പോയത് ഏഴുലക്ഷം ടിക്കറ്റുകള്‍; പൂര്‍ണ ഫിക്‌സറും സമയവും അറിഞ്ഞിരിക്കാം | FIFA Arab Cup Qatar 2025