കൊളംബൊ: ഡിറ്റ് വാ ചുഴലിക്കാറ്റിനെ തുടര്‍ന്നുള്ള പേമാരിയില്‍ ശ്രീലങ്കയില്‍ മരണ സംഖ്യ 159 ആയി. 191 പേരെ കാണാതായി. അഞ്ചു ലക്ഷം പേരെ പ്രളയം ബാധിച്ചു. ചുഴലിക്കാറ്റിനെ തുടര്‍ന്ന് രാജ്യത്ത് പ്രസിഡന്റ് അനുര കുമാര ദിസാനായകേ അടിയന്തരാവസ്ഥ പ്രഖ്യാപിച്ചു. ഡിസംബര്‍ 4 വരെ ആരോഗ്യ അടിയന്തരാവസ്ഥയും പ്രഖ്യാപിച്ചിട്ടുണ്ട്.

വെള്ളിയാഴ്ച ചേര്‍ന്ന സര്‍വകക്ഷി യോഗത്തിലാണ് തീരുമാനം. ഡോക്ടര്‍മാരുടെ ട്രേഡ് യൂനിയന്‍ പ്രസിഡന്റിന് അയച്ച കത്തിലും ആരോഗ്യ അടിയന്തരാവസ്ഥ പ്രഖ്യാപിക്കണമെന്ന് ആവശ്യം ഉന്നയിച്ചിരുന്നു. ഡിസംബര്‍ 16 വരെ സ്‌കൂളുകള്‍ രാജ്യത്ത് അടച്ചിടും. 78,000 പേരെ 800 ദുരിതാശ്വാസ കേന്ദ്രങ്ങളില്‍ പ്രവേശിപ്പിച്ചു. സ്‌കൂളുകളിലാണ് കൂടുതലും ദുരിതാശ്വാസ കേന്ദ്രങ്ങള്‍ പ്രവര്‍ത്തിക്കുന്നത്. ഇന്നും മഴ തുടരുമെന്ന് കാലാവസ്ഥാ വകുപ്പ് മുന്നറിയിപ്പ് നല്‍കിയിട്ടുണ്ട്. ദുരിത ബാധിതര്‍ക്ക് ദാലുംഗലയിലെ തകിയ മുസ് ലിം പള്ളി കേന്ദ്രീകരിച്ച് ഭക്ഷണ വിതരണം നടത്തുന്നത് ആശ്വാസമായി. കൂടുതല്‍ പേര്‍ക്ക് ഭക്ഷണ വിതരണം നടത്തുമെന്ന് ഓര്‍ഗനൈസര്‍ റിഷാം അഹ്മദ് പറഞ്ഞു.