തിരുവനന്തപുരം: രാജസ്ഥാനിലെ ബിക്കാനീറില്‍ മലയാളി യുവതിയെ കൂട്ടബലാത്സംഗം ചെയ്ത സംഭവത്തില്‍ കുറ്റക്കാര്‍ക്കെതിരേ കര്‍ശന നടപടിയാവശ്യപ്പെട്ട് മുഖ്യമന്ത്രി പിണറായി വിജയന്‍ രാജസ്ഥാന്‍ മുഖ്യമന്ത്രി വസുന്ധര രാജയ്ക്ക് കത്തയച്ചു. സംഭവത്തില്‍ ഫലപ്രദമായ അന്വേഷണം വേണമെന്ന് ആവശ്യപ്പെട്ട മുഖ്യമന്ത്രി അതിക്രമത്തെ അതിജീവിച്ച ഡല്‍ഹി നിവാസിയായ യുവതിക്ക് ആവശ്യമായ പിന്തുണ നല്‍കണമെന്നും കൂട്ടിച്ചേര്‍ത്തു.

കഴിഞ്ഞ 25ന് ഉച്ചയ്ക്കാണ് മലയാളി യുവതിയെ തട്ടിക്കൊണ്ടു പോയി കൂട്ടബലാത്സംഗം ചെയ്തത്. ബിക്കാനീറില്‍ രണ്ടു വര്‍ഷം മുന്‍പ് വാങ്ങിയ ഭൂമി സന്ദര്‍ശിച്ച ശേഷം മടങ്ങാനായി ഖാടു ശ്യാം മന്ദിറിനു സമീപം വാഹനം കാത്തുനില്‍ക്കുമ്പോഴായിരുന്നു സംഭവം. കാറില്‍ ലിഫ്റ്റ് നല്‍കാമെന്ന് വാഗ്ദാനം ചെയ്തപ്പോള്‍ യുവതി വിസമ്മതിച്ചു. എന്നാല്‍ പിന്നീട് ഇവര്‍ യുവതിയെ ബലമായി കാറില്‍ പിടിച്ചു കയറ്റുകയായിരുന്നു.

കാറിലും വിവിധ സ്ഥലങ്ങളില്‍ കൊണ്ടുപോയും നിരവധി പേര്‍ പീഡിപ്പിച്ചുവെന്ന് യുവതി പരാതിപ്പെട്ടു. അടുത്ത ദിവസം പുലര്‍ച്ചെ തട്ടിക്കൊണ്ടു പോയ അതേസ്ഥലത്ത് തന്നെ കൊണ്ടുവിടുകയായിരുന്നെന്ന് ജയ് നാരായണ്‍ വ്യാസ് കോളനി പൊലിസ് സ്‌റ്റേഷനില്‍ നല്‍കിയ പരാതിയില്‍ യുവതി പറഞ്ഞു.